Dr. Joachim (tanga’) guminambar pongingitanan miampai tongo’ mamaramit setifikit kopongunsikohan kuminaa 14 bagas Exco Komulakan om Kumoduo Luguan Komulakan PBS.
KOTA KINABALU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minonuhu’ sukod wagu PBS do tumonggoi popoguil’ kobontugan parti.
“Let’s make PBS great again (kanou pobontugo’ tokou kawagu PBS,” ka disio ontok minoboros id Ramai Pongunsikohan Exco Komulakan PBS doid Hotel Raia, Sembulan, do hiti di konihab.
Minanangkabayahan isio kumaa Exco Komulakan PBS mantad kinalantaion pinapaanjur seminar i naampai tongo’ puru exco “Pemuda will be the work force for PBS (Komulakan kosili puru kukumaraja’ montok PBS)… Komulakan PBS kiguno paharo kohomboan sumuang kumaa koiyonon pototongkop pogun Sabah lolobi no i haro kosiwatan montok kalantoi om kada’ indado’ dumontol Pomilian Agayo Pogun (PRN) om sumuang nogi’ id kinoiyonon,” ka disio.
Manahak kalantaion kumaa Gabungan Rakyat Sabah (GRS) nopo nga’ i posuulon, ka disio pinoposotol.
Dr. Joachim (tanga’), Julita (kaapat, gibang) guminambar miampai exco komulakan di nokotindapou.
Minoboros isio, piuhupan Bersatu Solidariti (BEST) pialatan PBS om Parti Solidariti Tanah Airku (STARSABAH) kiguno tilombuson.
“PBS is a multiracial party (PBS nopo nga’ parti orukut tinaru) om kiguno monimporon kinalantaion id koiyonon Kadazan-Dusun-Murut (KDM) suai ko’ kakal karamit sokodung id kinoyonon Mamasok Islam.
“Ilo’ pogi’, suhuon ku oinsanan dati’ misompuru om okito agaras tu’ maya’ no diti kaanu tokou lumantoi id kinoiyonon dilo’,” ka disio.
Pinapanau nogi’ o kinapatahakan setifikit kopongunsikohan kumaa 14 bagas Exco Komulakan om bagas Kumoduo Luguan Komulakan PBS.
Seminar dilo’ kituduan montok mongingkawas ginoris mongimbayat kororohian sukod wagu montok sumompuru PBS om monginggirot po do sunduan mongupus parti id nayatan Komulakan PBS.
Nokotindapou nogi’, Monunurat Agayo PBS, Datuk Julita Majungki; Monobubut, Datuk Lu Kim Yen; Monunurat Eksekutif, Mesilus Roman; Monguhup Monunurat Agayo, Datuk Jonnybone Kurum; Luguan Komulakan, Dr. Christoper Mandut; Ponorikohon Manganganjur, Louis Lai; Puru ngaawi’ Bohogian, tongo’ Luguan Bohogian om pipiro po Exco Koonduan.
