Boyoon Montiri, Datuk Seri Haji Hajiji Haji Noor tuminabi’ di Kumoduo Boyoon Montiri II, Datuk Seri Dr. Joachim Gunsalam (gibang) om poingintong i Kumoduo Boyoon Montiri III, Datuk Ir. Shahelmey Yahya pogulu nokotimpuun pitimungan DUN Sabah di tadau baino’.
KOTA KINABALU: Koporintaan Pogun toririmo papatantu’ kaadason id palatan ginumu’ koinsanai Native Title/Field Register (NT/FR) om tana’ pajakan (leases) id sunduk kapanahakan kosongonuan tana’ montok mamagampot sondikoton Koporintaan Pogun do monoibau komosikinan om mongingkawas koburuon pogun.
Monguhup Montiri kumaa Boyoon Montiri, Datuk Nizam Abu Bakar Titingan minoboros, upalai tana’ i pinolulus do Koporintaan Pogun i potuu katatapan Country Lease (CL) toi ko’ NT nopo tumanud di koponukatan id kinoiyonon pogulu geran draf NT toi CL aanu posodiaon do Koupisan Tana’ om Monukat (JTU).
Pinointalang diiso, soginumu’ 4,339 geran draf miampai ginayo 8,787.41 hektar montok upalai tana’ katatapan NT/FR nokosodia’ po’ompus toun 2023.
Naamot, soginumu’ 406 geran draf miampai ginayo 5,199.53 hektar montok upalai tana’ kikatatapan pajakan (leases) pinosodia’ po’ompus toun 2023.
“Geran NT/FR aanu no do papatahak songonuon kumaa tanak mamasok pogun Sabah noopo, naamot CL aanu patahakon asanganu kumaa komponi, tinan kikoundangan om nogi’ minsosongulun i potuu mantad toi okon ko’ mantad Sabah.
“Koporintaan Pogun toririmo manahak koposuulan kumaa kapatahakan kosongonuan tana’ mamasok pogun miampai tuduan montok monoibau komosikinan om nogi’ mongingkawas rontob koposion diolo’,” ka disio id pitimungan Lintuhun Undangan Pogun (DUN) Sabah, do hiti di tadau baino’.
Minonimbar isio ponguhotan di Datuk Raime Unggi (ADUN Sinili) i minuhot ginumu’ ginayo tana’ om tintob geran NT om CL i pinolulus do koporintaan kumaa tongo’ mongungupalai i kapaampai do mogigiyon Sabah.
I Nizam minoboros, tumanud pinogintoban JTU, ginumu’ geran tana’ poinrojistor NT/FR gisom ko 31tw Kotolu 2024 nopo soginumu’ 230,540 toi ko’ 54% mantad ginumu’ koinsanai geran tana’ i poinrojistor id Sabah.
Naamot, ginumu’ tana’ pajakan (leases) poinrojistor montok timpu miagal nopo nga’ 200,087 toi 46% mantad ginumu’ koinsanai geran tana’ poinrojistor.
“Tana’ pajakan nopo oponsol id kopoburuan ikonomi pogun Sabah ilo’ nopo id sunduk pomuhuan asil pogun, koburuon, kopoopuan om nogi’ kosiwatan pakarajaan,” ka disio.
