Hajiji Haji Noor
KOTA KINABALU: Piuludan i nowonsoi id piromutan mogigiyon mogisuai koubasanan, tinaru om ugama’ id Sabah kiguno toririmo gompion, ka di Boyoon Montiri (KM), Datuk Seri Hajiji Haji Noor.
Ka disio, ilo’ nopo nga’ ginaras om kointutunan oponsol Sabah i kiharo 35 etnik om 217 sub-etnik i mogiboboros id lobi 50 boros om 80 bobor sandad tinaru.
Tumanud disio, pisuayan tinaru om ugama’ okon ko’ kaantob montok masi miampai oulud. Pogipapantangan id nayatan rayat nopo nga’ wookon kunci kalantaion Sabah id kopomogompian pisompuruan tinaru.
Pinokianu disio mooi do kogos piobpinoian tulun Islam id ponong koiyonon diti kotilombus inggirotan id pigirotan “ukhuwwah islamiyyah” om momogompi’ nubasanan pogititimbangan nogi’ pisompuruan mooi do amu’ obingampawong toi oumpadanan di koyuyuon ngaawi’ poindala’ (ekstrem).
“Piompinoian diti oponsol sabab ilo’ nopo nga’ nosili pongogot kumaa inggisaman ngaawi’ piuludan om koburuon tumanud do prinsip-prinsip kaadangon, Rahmah om pilisihan. Ponudukan Islam nga’ poposotol nogi’ do koyuon pogititimbangan om pogi’isaan.
“Maya’ do koyuon ngaawi’ dilo’, sugaton tokou montok mamantang pisuaian i haro id mogigiyon om mamaramit katapatan kopogisusuaian miagal di pinatantu’ doid Islam,” ka disio ontok pinopoimagon Seminar Keharmonian Serantau doid Longkod Konvensyen Sompomogunan (SICC), do hiti, di tadau baino’. Teks boboroson disio binasa’ di Montiri Sains, Tikonologi om Inovasi Pogun, Datuk Dr. Mohd. Arifin Mohd. Arif.
Hajiji minoboros, id kopoinggirotan pisompuruan ummah songkoiyonon monotkmonoguang tongo’ kaantaban pomogunan maso-maso, tulun Islam kiguno inggonopan do ginoris ‘intelektual’, ‘kreativiti’ om koponikotopongan di akawsa, kaampai kaantaban, kosimbanon kumaa karalano’ koposion i kaanu manahak waya’ kumaa piromutan id mogigiyon mogisuai koubasanan om ugama’.
Tumanud disio, tulun Islam sabaagi mogigiyon i ahakon do koyuon ugama’ om hal ngaawi’ araat i kopoinggayo po do wolit pisuayan id mogigiyon kiguno salasaion poinsonong.
Kohondot dilo’, pinokianu disio tulun Islam id pomogunon diti kosuul no id Sabah mooi do amu’ kogompit di nombo-nombo tinimungan ekstreme i kopongumpadan kotoronongon, pisompuruan om piompinoian nogi’ piuludan pogun.
Hajiji minoboros, pogibabarasan piuludan om kotoronongon amu’ koidu’ mantad mogiboboros di hal kopogisusuaian tulun do poinpuli.
Ponongkoiyonon diti o kosuul, kapaampai mogisusuai tinaru, koubasanan om ugama’ tantu’ no do iso’ koyuon i kiguno uludon miampai ralan di bobos osonong, ka disio kawagu.
“Lumansan oku piuludan om kotoronongon di haro id nayatan mogigiyon i orurukut id ponongkoiyonon diti kosili ombitanan kumaa pomogunan,” ka disio pinoposotol.
