Duo ruputan pulis i winonsoi dilo’.
KOTA KINABALU: Duo9 ruputan pulis winonsoi doid Balai Pulis Kota Belud om Penampang di kosodop montok papasaga’ boogian kikuasa’ nogi’ Suruhanjaya Multimedia om Komunikasi Malaysia (SKMM) popoindalan ponoriukan kumaa laman Facebook Edisi Panas Sabah, admin toi nombo-nombo i poinggompit di kinopotonuan totondos oudut i minonondos di Boyoon Montiri, Datuk Seri Hajiji Haji Noor i kaka om minomoguno sala’ kuasa.
Biro Kopointalangan Parti Gagasan Rakyat (Gagasan Rakyat) pinopoilo id kopointalangan di tadau baino’, ruputan pulis dilo’ pinopoilo do totondos i winonsoi dilo’ araat kopio om ponondos nopo tomod om winonsoi ilo’ mantad no do amu’ orohian di naangayan osonong koporintaan do noondo.
“Ruputan diti nga’ winonsoi mooi do bohogian kikuasa kopomonsoi laang om ponoriukan kohondot nombo-nombo upisor koporintaan i nokogompit doid kinapatayadan totondos dilo’ nogi’ pinopointalang hal lisokon porinta’ id siriba’ Akta Rahsia Rasmi 1972,” ka do biro diolo’.
Pogulu dilo’, i Hajiji id kointalangan di konihab minogolim totondos pinomogunaan sala’ kuasa’ id kinopolulusan pibatosan tana’ id Kudat.
“Totondos dilo’ kituduan araat, montok pulitik om nogi’ montok paparaat do ngaran ku. Upis ku manahak sokodung poinponu’ kumaa nunu-nunu ponoriukan kohondot totondos dilo’,” ka disio.
“Oinsanan upalai nokoindalan do karalanon di gunoon maya’ mitingan Puruankuasa’ Pomogunaan Tana’ (LUC) om karaja’ id upis.
“Upalai tana’ Yayasan Sabah nokosuku’ kumaa Kotinanan Potunud Innoprise Corporation Sdn. Bhd. om oinsanan winonsoi tumanud undang-undang,” ka disio minonimbar totondos id laman Facebook dilo’.
Ponoriukan maan wonsoiyo’ om laang poinpatut onuon kohondot upisor i pinapalabus dokumen olisok i ginuno montok minomonsoi totondos dilo’, ka disio.
Hajiji minoboros, bohogian kikuasa’ nga’ pinoilo kokomoi akaun Facebook dilo’, i pinapahabar totondos dilo’ montok momiraag ngaran tosonong disio.
“Miboros oku miampai luyar ku montok monimpuun laang undang-undang kohondot totondos oudut diti,” ka disio.
