Hajiji miampai lansanon om mongongobi’ Gagasan Rakyat Bohogian Kiulu id Lintuhun Mogigiyon Kiulu di tadau baino’.
KIULU: Ponuridongan Sekretariat Watas Okoro’ Kiulu i kapagawi’ balanja’ RM5 riong maan timpuunai do amu’ no alaid, ka di Boyoon Montiri, Datuk Seri Hajiji Haji Noor.
Minoboros isio, koporintaan pogun buruanon Gabungan Rakyat Sabah (GRS) sumikap montok poposili Kiulu songinan Watas Okoro’ id timpu tolu wulan katalib kikuasa’ om pinapatantu’ ponuridongan sekretariat watas dilo’.
“Poburuon tokou Kiulu sabaagi longkod ponombuluyan sabab ilo’ pasanganu pialatan tongo’ popoindalan ponombuluyan mimpau mogigiyon (CoBT) bobos ogumu’ id pogun diti, hinombo do Adun Kiulu Datuk Joniston Bangkuai kumaraja’ agaras montok poposili Kiulu sabaagi hab ponombuluyan CoBT,” ka disio ontok pinopoimagon mitingan agayo toun-toun Parti Gagasan Rakyat Sabah (Gagasan Rakyat) Bohogian Kiulu id Lintuhun Mogigiyon, do hiti, di tadau baino’.
Hajiji minonuntung tagung montok pinopoimagon mitingan tagayo toun-toun Gagasan Rakyat Bohogian Kiulu.
Hajiji po nogi’ Presiden Gagasan Rakyat minongunsub nogi’ puru parti mooi do mingat-ingat di koulalaho’ mimponondos i nakatayad doid media sosial.
“Mimang oku koinsanai puru tokou popohunung koinsanai totondos pilasu id media sosiol i patayadon diolo’ i aiso’ tinonggungan.
“Koporintaan nokosigampot ogumu’ kinalantaion nga’ ogumu’ i mogolim dilo’ maya’ do totonsdos. Amu’ tokou kapasaga’ rayat akasou di laang bohogian aiso’ tinonggungan diti,” ka disio.
Ponorikohon GRS dilo’ minoboros, oponsol montok Gagasan Rakyat do misokodung miampai tambalut kongsi montok manalob pongumbalan momiraat kaadangon koporintaan.
Hajiji pinapatahak watikah kinoposilihan kumaa songulun mantad AJK Gagasan Rakyat Bohogian Kiulu.
Hajiji minanahak nogi’ jominan do popoburu’ montok koinsanai parti id Kiulu.
Poingkuro po, sabaagi Boyoon Montiri, minoboros isio, mongobi’ do oinsanan rayat Sabah amu’ momuntuk tinaru, ugama’ om nantadon.
Nokotindapou nogi’ i Joniston, Luguan Bohogian Gagasan Rakyat Kiulu, Janih Bangud om lansanon parti om komponen kaampai no Luguan Monunurat STAR, Datuk Edward Linggu om Timbang Presiden UPKO, Fairuz Bandar.
