Hajiji Haji Noor
KOTA KINABALU: Sabah mamaramai do Tadau Sabah ontok ko 31tw Kowalu’ diti montok momohondom tadau kinosilihon pogun minomorinta’ sondiri’ 60 toun nakatalib, ka di Boyoon Montiri (KM) Datuk Seri Hajiji Haji Noor.
Minoboros isio, Kabinet Pogun minomonsoi kotontuan dilo’ id mitingan minggu’ nakatalib om minomili’ do Tambunan sabaagi mananwalai montok kapamaramaian kumoinsan nogi’ diti.
“Kabinet nga’ pinapatantu’ nogi’ do kapamaramaian montok ponokotanda’ kisinusuyan kahandaman oponsol Sabah ramaion tikid toun miampai koiyonon dilo’ pogisosowolionon id nayatan watas,” ka di Boyoon Montiri id iso’ kointalangan id tadau baino’.
“Kanou tokou no mamantang om momuhondom tadau i nokopotanda’ kinoompokon pinomorintaan mogkukuasa’ British id Sabah om nokopotanda’ pinamanahan tokou montok misompuru sabaagi mogigiyon do minonuridong pinomorintaan sondiri’,” ka disio kawagu.
Sabah do talib dilo’ minonuridong do Pisompuruan Malaysia miampai do Tanah Melayu, Sarawak om Singapura di ko 16tw Kosiam 1963.
Hajiji minoboros, ababayan id Tambunan dilo’ pinatantu’ do jaam ko 3 sodopon katalib kapamaramaian Tadau Kabansaan do hiti.
