Hajiji miampai tongo’ Puru Parlimen GRS om Tenom id pinirubaan doid upis disio id Menara Kinabalu, Kota Kinabalu, di tadau baino’.
KOTA KINABALU: Boyoon Montiri, Datuk Seri Hajiji Haji Noor minamaramit kinotombuluyan apantang mantad duo tulun Montiri Pisompuruan om nogi’ Puru Parlimen Gabungan Rakyat Sabah (GRS) om Tenom id upis disio doid Menara Kinabalu, do hiti, di tadau baino’.
Yolo’ nopo nga’ i Montiri Karaja’ Agayo, Dato Sri Alexander Nanta Linggi om i Montiri Intodonon Tulun, V. Sivakumar.
Tinonudan di Alexander kapaampai di Kumoduo Montiri Karaja Agayo, Dato Sri Abdul Rahman Mohamad; Luguan Monunurat (KSU) Komontirian, Datuk Seri Haji Hasnol Zam Zam Haji Ahmad; Kumoduo KSU, Dato’ Zahrul Hakim Abdullah om i Luguan Potunud Koupisan Karaja’ Agayo (JKR), Datuk Ir. Ahmad Redza Ghulam Rasool.
Hajiji nonuan kopointalangan karait di kopoindalanan Projik Ralan Agayo Pan Borneo id Sabah, tongo’ karjaa’ koponginsonongan talun-alun pisompuruan om mogisusuai hal om kaantaban i potoguang id kopoburuan om kapamansaian kogogonopan infrastruktur id Sabah.
Hajiji miampai di Alexander ontok minamaramit kinotombuluyan apantang doid upis disio id Menara Kinabalu, Kota Kinabalu, di tadau baino’.
Nokotindapou nogi’ i Kumoduo Boyoon Montiri po nogi’ Montiri Karaja’ Agayo, Datuk Ir. Shahelmey Yahya om tongo’ mongunguhup montiri, yolo’ nopo nga’ i Datuk Limus Juri om Datuk Robert Tawiq.
Naamot dilo’, i Sivakumar tinanud di Kumoduo Montiri Intodonon Tulun, Mustapha Sakmud om i Kumoduo Luguan Monunurat (Katatapan om Sompogunan) Dato’ Haji Amran Haji Ahmad.
Hajiji pinapaharo po nogi’ pinirubaan miampai di Puru Parlimen GRS yolo’ nopo nga’ i Montiri id Koupisan Luguan Montiri (Hal Sabah, Sarawak om Karaja’ Ngaawi’ Pinotomod), Datuk Armizan Mohd. Ali i po nogi’ Puru Parlimen Papar; Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Akanon, Datuk Seri Dr. Jeffrey Kitingan (Keningau)’; Datuk Jonathan Yasin (Ranau); Datuk Matbali Musah (Sipitang), Lo Su Fui (Tawau) om Puru Parlimen Tenom, Riduan Rubin.
