Dr. Joachim (koduo, wanan) guminambar pongingitanan katalib nopupusan ababayan minananom kayu id ababayan Bingkil Resolusi I-HIJAU Laang Piuhupan PBT om Mogigiyon id Zon 2 (Kounsol Watas Keningau, Tambunan, Tenom om Kounsol Watas Nabawan).
KENINGAU: Komontirian Koporintaan Koiyonon om Pomuwalaian (KKTP) minamalan pipiro kotontuan wookon dilo’ ‘Dasar Lanskap Pogun Sabah’ i pinopoulud hontolon id nayatan pogun monotk papatantu’ kopoburuan lanskap pogun di osonong, aanu iyonon, oulud miampai koponguludan lanskap poinpoopori nogi’ pososorili’ di poinggompi’.
Kumoduo Boyoon Montiri po nogi’ Montiri KKTP, Datuk Seri Dr. Joachim Gunsalam minoboros, pinalan nogi’ o Inggisaman KKTP kumaa Mogigiyon Osiriba’ Karbon montok popoingubas nubasanan/kopoindalanan montok mongubas mogigiyon popoindalan nubasanan osiriba’ karbon.
Ka disio, palan ngaawi’ inggisaman kopotomohan tilombuson papagaras maya’ palan karaja’ Komontirian id siriba’ kotontuan diti.
Dr. Joachim (ko’onom, gibang) guminambar pongingitanan miampai di Rafie (kolimo, gibang), Nurulhayati (kaapat, gibang) nogi’ tongo’ upisor eksekutif om puru kounsol i nokotindapou doid ababayan.
Tumanud disio, wookon kotontuan Komontirian i monguhup kopotomohan diti nopo nga’ i posusuhut;
i) Tikid kolulusan kopoburuan papatantu’ di popoburu’ pomuwalaian poposodia’ sokokoro’ 10 pihatus kinoiyonon osinggawa’ i kiginayo iso’ ekar om id kawas doid koposodiaan pososorili’ osimbayanan ilo’ nopo nga’ koiyonon ‘rekreasi’ kumaa tulun ginumuan.
ii) Kopoindalanan Indeks Linimput Otomou (GBI) pasarabakon id pomomonsoi tumanud konsep poinggompi’ hinombo do ginoris, waig om kogogonopan di gunoon nopo nga’ opulokis.
iii) Koposodiaan sistem piromutan mintana’ om mimbosikol, sistem talun-alun om padsakaian i kikonsep OTOMOU (HIJAU).
iv) Konsep HIJAU i komoyon nopo nga’ miagal do kopodigitalan lestari om komponen HIJAU id pomogunaan sistem sumbu solar, sistem ponimungan waig rasam, kogogonopan di asarabak waig (permeable paving), pomogunaan 5R (Refus, Reduce, Recycle, Reuse & Recovery) om sopiagal dilo’.
“Kohondot dilo’, komponen HIJAU oponsol kopio id inggisaman mongingkawas kopulokison Bohogian Kikuasa’ Nokoiyonon (PBT) id kapamalanan kopoburuan id kinoiyonon pitamangan diolo’ sompoopori,” ka di Dr. Joachim ontok pinopoimagon Bingkil Resolusi I-HIJAU Laang Piuhupan PBT om Mogigiyon id Zon 2 (Kounsol Watas Keningau, Tambunan, Tenom om Kounsol Watas Nabawan) i pinaharo id Taman Bandukan Riverside Resort, do hiti, di tadau baino’.
Dr. Joachim minoboros, bingkil dilo’ kosudong kopio sabaagi pongunsub kumaa kopoindalanan kopoburuan kumaa mogigiyon aanu iyonon.
“Koponorinaan koporintaan om kopongubasan mogigiyon osiriba’ karbon kouhup mongimbulai pososorili’ iyon-iyonon di lobi kopounsikou.
“Tonggungan PBT id tikid watas sompoopori nopo nga’ oponsol kopio montok mongimbulai kakadayan om pongingiyonon tulun di osimbayan, oumolig, ogirot om po’ompus. Palan id tikid watas kiguno mimpau kumaa ponginsomokan infrastruktur otomou montok mongingkuri’ waya’ pulou linasu’ om monginsiriba’ kaantakan kadaaton di kapaampai do kotutudan, magadau om liyud,” ka disio pinoposotol.
Dr. Joachim (tanga’) guminambar miampai toinsanan tombului om tutumanud di nokotindapou.
Pinopolombus nogi’ isio kopongunsikohan kosuul no kumaa apat kounsol watas di nakaampai pinalantoi ababayan dilo’, puru ngaawi’ kounsol om Unit Lansanon Kopoburuan Mogigiyon i opusou kopio kumaa kopurimanan kopoburuan mimpau do kopomogompian sandad posorili’.
Bingkil nopo dilo’ nga’ kinopongoputan ababayan Festival I-HIJAU KKTP: Inisiatif HIJAU KKTP, Aspirasi Sabah Maju Jaya di ko 15tw Koturu’ 2023.
Nokotindapou nogi’ i, Nurulhayati Awang More, Arkitek Landskap Sektor Landskap om Kelestarian KKTP; Inchek Anam, Monguhup Upisor Keningau; Mohd Fawzi Abdul Kadir, Upisor Eksekutif Kounsol Watas Keningau sabaagi mananwalai bingkil; Hj. Mohd Saidi Hj. Mohd Ibrahim, Upisor Eksekutif Kounsol Watas Tenom; Rizal Maulah, Upisor Eksekutif Kounsol Watas Tambunan; Mumin Amsah, Upisor Eksekutif Kounsol Watas Nabawan; Rafie Robert, Kumoduo Ponorikohon Kounsol Watas Keningau.
