Hajiji Haji Noor
KOTA KINABALU: Pisokodungan id pialatan Gabungan Rakyat Sabah (GRS) om Pakatan Harapan (PH) doid koporintaan Perpaduan id Sabah kotilombus id pomilian agayo dumontol.
Tumanud Utusan Malaysia, Ponorikohon GRS, Datuk Seri Hajiji Haji Noor minoboros, aiso’ koimbulai hal GRS magada’ pisokodungan miampai parti nasional id koponoguangan Pomilian Agayo Pogun (PRN) do obontol.
Boyoon Montiri dilo’ minoboros, kointalangan Presiden Parti Maju Sabah (SAPP), Datuk Seri Yong Teck Lee i pinopoilo do parti nasional amu’ apatut tumanding id pomilian agayo doid nayatan pogun nopo nga’ pomusarahan sondiri’ disio om okon ko’ mongobi’ pomusarahan GRS.
Presiden Parti Gagasan Rakyat Sabah (Gagasan Rakyat) dilo’ minoboros, hal kopohompit pisokodungan id pomilian agayo kiguno pogibabarsaan do osorisid pialatan turu’ parti i posompuru GRS.
“nga’, orohian oku poboros do pomilian agayo obontol, yati’ nopo nga’ id koporintaan Perpaduan kamapai no PH id Sabah.
“Amu’ tokou kaanu miada’ miampai koombolutan tokou i potuu PH toi ko’ Barisan Nasional (BN) sabab mimang tokou do popoburu’ Sabah om mogigiyon tokou. Mantad dilo’, kada’ adalaan mimpulitik hilo’ hiti,” ka disio katalib ababayan Apresiasi Koponguludan Sikul 2023 do hiti id konihab.
Tumanud di Hajiji, GRS nopo nga’ piomungan i kapaampai turu’ parti nokoiyonon om hal poinggompit do pisokodungan dumontol pomilian agayo amu’ po nopogibabarasan sabab pomilian agayo maan pohoroo’ id timpu duo po toun.
Noondo diti, koporintaan di buruanan do GRS moningkanan do inggisaman popoburu’ poguno m manalasai kobolingkahangan rayat miagal do kobolingkahangan pangaba’ waig om lotirik, ilo’ lobi koponsol.
Minongomi potilombus ka disio, orohian isio poposotol do koporintaan pogun babaino’ diti nopo nga’ koporintaan i buruanon do GRS om PH.
“Mantad dilo’, agayo ponongkounsikohan tokou kumaa PH,” ka disio.
Di tadau Minggu’ nakatalib, Teck Lee minoboros do GRS kiguno tumanding id koinsanai 73 tindikohon Lintuhun Undangan Pogun (DUN) Sabah ontok PRN do obontol.
Ka disio, GRS amu’ nuru’ minoboros miampai nombo-nombo parti suai i orohian sumili tambalut misokodung id pomilian agayo sabab parti nasional amu’ apatut do tumanding id nayatan pogun.
