Hajiji Haji Noor
KOTA KINABALU: Bank Pembangunan Sabah (SDBank) poilihon id siriba’ kaganaan kuasa’ Boyoon Montiri, Pogun Sabah (Ordinan Boyoon Montiri (Pemerbadanan)) mantad komponi takawas dau do noondo, Sabah Development Berhad, om poilihon id siriba’ kopiantangan mitilombus Komontirian Kousinan.
Pinapahabar do hal diti di baino’, Boyoon Montiri, Datuk Seri Hajiji Haji Noor minoboros, laang dilo’ nopo wookon mantad laang i pinolulus do Kabinet Pogun montok monginggirot sokodung pogun kumaa SDBank.
“Laang diti popoimagon tonggungan Pogun montok monokodung poinponu’ SDBank id kopoindalanan ‘obligasi’ (tinonggungan) kousinan dau om monumboyo’ angkab kosunion dilo’.
“Angkab-angkabon i pinoigitan montok gumura’ potoguang nopo nga’ montok SDBank moningkanan osorisid kumaa projik kopoburuan i kirati mantad sunduk sosiol om ikonomi nogi’ tinonggungan kumaa sandad posorili’ id Sabah,” ka disio.
Boyoon Montiri minoboros, Lembaga wagu i tinuridong montok popoburu’ SDBank kumaa koyuon diti, miampai di Datuk Seri Lim Haw Kuang sabaagi Ponorikohon Eksekutif.
Puru Lembaga Potunud di suai nopo Monunurat Pointatap Komontirian Kousinan, Datuk Mohd. Sofian Alfian Nair; Patricia Ubing (Potunud Mimpoopori Okon Eksekutif Totuo); Datuk Vincent Pung; Dr. Dionysia Kibat om Datuk Brenndon Keith Soh.
Hajiji minoboros, SDBank nga’ mongukab nogi’ do piilangan ‘strategik’ miampai kotinanan kousinan kopotundaan (DFI)suai montok mambayar projik kopoburuan di tingkananon id Sabah.
“Koporintaan Pogun mintong SDBank sabaagi kunci do monokodung lugu’ strategik pogun id siriba’ Hontolon Sabah Maju Jaya id kopointutunan om kopoindalanan projik kopotundaan montok koponsolon bobos osonong Sabah,” ka disio.
