Dr. Joachim (tanga’) guminambar miampai tongo’ pakakaraja’ media.
KOTA KINABALU: Tonggungan tongo’ kukumaraja’ media i momonsoi ruputan doid Lintuhun Undangan Pogun (DUN) Sabah potilombus do unsikohon.
Okon ko’ pinoposodia’ koiyonon di kosudong, mononorina’ DUN Sabah nga’ pointopot nogi’ do papatantu’ hal kosimbayanan, koumoligan, sinonong taakanon nogi’ kogogonopan internet kisiniau akawas toririmo id rontob di bobos osonong.
Om nogi’, longkod media i poindalanon miampai Koupisan Kopointalangan Pogun Sabah dilo’, nosili nogi’ do longkod piromutan id pialatan tongo’ puru media om puru ngaawi’ Lintuhun Undangan Pogun (ADUN).
Id Mitingan Koduo Penggal Kaapat DUN Sabah Di Kohopod om Onom i nokoindalan pointonod tadau Koduo, longkod media dilo’ nokopokito pipiro ADUN minooi rumo-rumo di tongo’ pakakaraja’ media sabaagi mongunsikou karaja’ nogi’ kinapahabaran poinpuli i pinatahak po’ompus timpu pitimungan.
Wookon nopo nga’ Kumoduo Boyoon Montiri II om III, io’ Datuk Seri Dr. Joachim Gunsalam dii Datuk Ir. Shahelmey Yahya; Montiri Sains, Tiknologi om Inovasi, Datuk Dr. Mohd. Ariffin Arif, Phoong Jin Zhe nogi’ pipiro ADUN suai i pinopotoluod do takan-anakon.
Pinoposiwat nogi’ do timpu ruminuba’ di pakakaraja’ media ii Kumoduo Speaker DUN di wagu, Datuk Al Hambra Juhar.
Poingiliu id Tingkat 3 linimput dilo’, Longkod Media DUN korumpos 50 tulun toisoiso’ timpu do otopot nopo kapapanau nogi’ tonggungan oponsol id kapahabaran om kapatahakan kointalangan koporintaan nogi’ katatapan kumaa rayat.
