Hajiji Haji Noor
KOTA KINABALU: Poruntukan soginumu’ RM1 bilion montok monimpuun karaja’ monginsonong kogogonopan om ginoris Kompleks Kositum, Imigrisin, Kuarantin om Koumoligan (CIQS) id piwolitan Sabah om Sarawak, kaanu manahak waya’ osonong piromutan id koiyonon piwolitan, ka di Boyoon Montiri (KM) Datuk Seri Hajiji Haji Noor.
Minoboros isio, ponuridongan CIQS id waya’an sumuang montok pomorisaan dumarapas piwolitan nosili ababayan tingkananon montok mamaramit waya’ osonong piromutanid koiyonon piwolitan, nosusuhut koundolihon longkod pogun Indonesia kumaa Kalimantan.
“Piromutan ikonomi di asarok kopongingkawas asil nindopuan pogun. Ponuridongan CIQS kapasaga’ rayat maya’ pomorisaan kosuangon miampai pohimagon om mongilag diolo’ sumuang aiso’ kasagaan maya’ ralan-ralan tikus di amu’ nookunan.
“Iti do miampai mitilombus kapanalob ababayan aiso’ kasagaan kaampai ponoludupan kopomusalaan suai id piwolitan,” ka disio ontok pinopoimagon Pongukaban Pitimungan Geostrategik Pogun Sabah (SGS) 2023, do hiti di tadau baino’. Teks boboroson disio binasa’ di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
Kolimpuunon tulan Koiso’ katatalib, Komontirian Kousinan minanahak kolulusan osopung kiginumu’ RM1 bilion montok monimpuun karaja’ ngaawi’ monginsonong kogogonopan om ginoris CIQS id piwolitan Sarawak om Sabah.
Karait do pitimungan dilo’, ka di Hajiji, pongonjuran ababayan dilo’ kotondu’ timpu dau sabab hal kinopoundolihan longkod pogun Indonesia kumaa Kalimantan momoguno laang osorisid om osikap id koinsanai nayatan.
Pitimungan di tadau baino’ nogi’ ka disio, nga’ iso’ posunduran montok oinsanan kotinanan tumimung id koposodiaan tongo’ katatapan timpu oniba’, gonsuhatan toi timpu anaru.
“Kinoiyonon tokou i mioros do Kalimantan koposili pogun diti kosuul no Sabah kiharo piromutan oronit miampai Indonesia. Popoilo oku koinsanai inggisaman puru akademik i pinopoindalan ponolidikan miampai poinponu’ tonggungan om kogumuan ponolidikan diti nopo nga’ kikoyuon do poinpuli; ogonop mantad koinsanai sunduk i potuu id sunduk koumoligan, ikonomi nogi’ sosial.
“Kohondot dilo’, pitimungan tadau baino’ diti nopo nga’ kotilombuson mooi do asil pinonolidikan om pinonuratand iti aanu timungon miampai kointalangan id kinoiyonon potilombus dino pokitanan id koyuon katatapan om palan karaja’ kituduan koburuon om kasasanangan pogun Sabah,” ka disio.
Mimang nogi’ isio pisokodungan om piuludan id pialatan puru akademik om monunuridong katatapan kiguno ingkawasan mooi do iso’ asil di bobos osonong aanu mongimbulai id koompokon pitimungan diti.
“Otumbayaan oku piomungan kopogisusuaian kabaahan id pitimungan diti kopongimbulai do koinwoguan pomosusarahan om pogi’ilangan kointalangan i kiguno pogi’langan sompipi’ kotinanan,” ka disio.
Soginumu’ 88 kotinanan om lobi 100 tutumanud minampai id pitimungan i kumoinsan nogi poonjuro’ dilo’.
