Hajiji Haji Noor
KOTA KINABALU: Karnival Usahawan om Koperasi Madani kopihondot Ramai Kaamatan onjuran Komontirian Kopotundaan Mongungusaha’ om Koperasi (KUSKOP) pohoroon solinaid duo tadau mimpuun ko 6tw Kolimo id Lintuhun Tun Hamdan, Tamparuli.
Ponorikohon Manganganjur Carl Moosom minoboros, karnival i kumoinsan nogi’ pohoroo’ id watas dilo’ pikikiro pohimogonon di Boyoon Montiri Datuk Seri Hajiji Haji Noor do jam ko 11 kosuabon, ko 6tw Kolimo.
Daamot kopoimaganan pomupusan Karnival om Ramai Kaamatan pohimogonon di Montiri Kopotundaan Mongungusaha’ om Koperasi, Datuk Ewon Benedick, do ko 7tw Kolimo (tadau Minggu’).
Minoboros isio, suai ko’ kopointalangan kokomoi kousahawanan om koperasi i patahakon di 10 kotinanan id siriba’ komontirian, pokikitanan om Kapadagangan Madani nga’ pohoroon nogi’ po’ompus karnival dilo’.
“Kopointalangan patahakon do Suruhanjaya Koperasi Malaysia (SKM), Tekun Nasional, SME Corp Malaysia, Institut Keusahawanan Negara (INSKEN), Amanah Ikhtiar Malaysia (AIM), Bank Rakyat, SME Bank, Institut Koperasi Malaysia (IKMa), UDA Holdings Berhad, SME Corp. Malaysia om Pernas.
“Ababayan Tunas Usahawan Bumiputera (TUBE) kosuul montok Sabah om Sarawak nga’ poimpuunon ontok tadau kopoimaganan karnival dilo’,” ka disio id kointalangan di tadau baino’.
Ka di Carl, soginumu’ 60 mongungusaha’ om koperasi tumanud pokikitanan om kapadagangan Madani.
Minoboros isio, ababayan dilo’ nga’ poindalanon kopiongoi di konsep Madani “nilai daya cipta Madani” maya’ kogompitan tongo’ mongungusaha’ om koperasi id pokikitanan om kapadagangan Madani.
Kohondot dilo’ alapon disio tulun ginumuan rumikot montok mamaramai potilombus dino maganu kointalangan poinggonop karait skim ngaawi’ kapangalasan om koponoluodan nogi’ tongo’ ababayan pingludaan kopohompit kousahawanan om koperasi i poindalon do mogisuai kotinanan id siriba’ Kuskop.
Ontok doungotuong nopo, ababayan kapamaramaian Kaamatan pohoroon id koiyonon di miagal mimpuun jam ko 6 sodopon i pikikiro pohimogonon di Kumoduo Presiden Kotinanan Kinabalu Progresif Bersatu (UPKO) Datuk Donald P. Mojuntin.
Mogisusuai ababayan koimbayat di noulud kopihondot karamaian dilo’ wookon pokikitanan sinding artis nointutunan Rosario Bianis, sayau koubasanan, Pialaan Sodop Rombituon om Sodop Pintutunan Unduk Ngadau UPKO 2023.
