Dr. Joachim
KUNDASANG: Tulun ginumuan lolobi i mamaramai Tadau Agayo Aidilfitri toun diti pinokianu tumilombus maganu laang oumolig montok mongilag orolihan Covid-19.
Kumoduo Boyoon Montiri po nogi’ Montiri Mongungulud Koponoguangan Covid-19 Sabah, Datuk Seri Dr. Joachim Gunsalam minoboros, sundung toun diti rayat id Sabah kikosiwatan mamaramai Aidilfitri miampai paganakan om koobpinoian do osimbayan aiso’ kopogoduhan, nga’ pogun diti amu’ po notonduli’ poinponu’ mantad Covid-19.
Dr. Joachim pinopoikid bubur lambuk om kurma id Kakadayan Kundasang, di tadau baino’.
“Ounsikou tooku sabab kaanu mamaramai Tadau Raya diti miampai otoronong sabab sopirati om sopipantang tokou tiso’ om tiso’. Paganakan id Sabah amu’ insan osompini’ di pisuayan ugama’ toi tinaru nga’ piniiso’ di pogitimbangan om pogirotian i akawas pialatan tinaru om ugama’.
“Montok di muli’ kampung nantadon, mamadaraib no do monidsorou om kitonggungan mooi do oumolig tokou muli’ om oumolig gumuli’ kumaa walai sompopori,” ka disio id Ababayan Kinopoikidan Bubur Lambuk pinaanjur Parti Bersatu Sabah (PBS) Bohogian Kundasang miampai sokodung Unit Lansanon Kopotundaan Mogigiyon (UPPM) Kundasang, do hiti di baino’.
Bubur lambuk dilo’ pinotoluod di Dr. Joachim i po nogi’ Puru Lintuhun Koundangan Pogun (ADUN) Kundasang.
Dr. Joachim pinapatahak bubur lambuk om kurma kumaa mongingindapu’ om tulun ginumuan id Kakadayan Kundasang.
Dr. Joachim nakaampai nogi’ id kinopoikidan bubur lambuk dilo’ id pososorili’ kakadayan i nokotimpuun di jam ko 4 sodopon.
Isio po nogi’ Kumoduo Presiden PBS minonongkounsikou kumaa sitaf UPPM Kundasang, Induk, Komulakan om Koonduan (IPW) PBS mantad tonggungan om kinogompitan pinapalantoi ababayan diti.
