RANAU: Upis Kotundunan Watas masaan mogihum puru paganakan om waris apat tanak-anak i pino’iliu id siriba’ Ponuhuan Panamangan Tulun I Kosudong om Kohunung (OYLS) do Kuut Tanak-Anak Ranau.
Mongungumolig id Upis Kotundunan Watas Ranau, Halisah Baharudin minoboros, tolu miadi’ om songulun bagang kiumur 11 wulan dilo’ niduanan di tina’ diolo’ miampai aiso’ nunu-nunu dokumen.
Montok kes tolu miadi’ kingaran do i Robert Mizan, 10; Mary Mizan, 8; om i Ruben Mizan, 5, yolo’ do noondo diti tamangan di tamanon diolo’ pointonod di wulan Koiso’ 2022 id kinoiyonon Kampung Sagindai Baru, do hiti.
“Poingkuro po, mananamong aiso’ kopotutan kapanamangan pohimagon montok mongulud kotundunan om sinikulan tanak-anak. Tanak-anak diti nga’ tinongkiadan nogi’ do aiso’ dokumen kointutunan tinan di nookunan,” ka disio.
Minoboros isio, tapa’ kopio do tanak-anak dilo’, i Mizan Maikol nokoidu’ pogun mantad iso’ kinoligaganan mutusikol di ko 12tw Kosiam 2018 id Ralan Tamparuli-Ranau, naamot tina’ diolo’ kingaran do i Lia Adrian kotumbayaan mamasok Filipina om aiso’ dokumen kointutunan di nokohimagon.
“Tina’ diolo’ minogidu’ om amu’ insan panahak balanja toi mongudio koyuyuon do tanak-anak dilo’. I mananamong nga’ mininggisom mogihum tina’ diolo’ nga’ amu’ nokoihum,” ka disio.
Ka di Halisa, tolu miadi’ dilo’ pino’iliu id siriba’ OYLS maya’ ponuhuan Kuut Tanak-Anak Ranau di ko 28tw Kotolu 2023.
Naamot dilo’, montok bagang kiumur 11 wulan kingaran do i Auxilio Pio, i mananamong pinopoilo di Halisah do tinamangan dau ilo’ pointonod di ko 2tw Kaapat 2022.
“Tumanud kointalangan di mitatamong, tina’ bagang dilo’ i Rahimah, mantad Indonesia om aiso’ dokumen kointutunan di nookunan.
“Tina’ bagang dilo’ i kotumbayaan mantad Keningau. Pinokitamangan dau o tanak-anak dilo’ kumaa di mananamong sabab amu’ katamong do bagang dilo’.
“Pointonod dilo’, tina’ kopio minogidu’ om amu’ naanu momoromut. I mananamong mininggisom mogihum tina’ dilo’ om waris nga’ amu’ nakalantoi,” ka disio.
Ka wagu di Halisah, tanak-anak dilo’ nga’ pino’iliu nogi’ id sahau OYLS, id kinoiyonon Kg. Lohan 1, Ranau, maya’ Ponuhuan Kuut Tanak-Anak Ranau di ko 28tw Kotolu 2023.
“Mantad no do i mananamong dilo’ aiso’ kopotutan kapanamangan tanak-anak, nga’ amu’ yau kaanu monompuan hal ngaawi’ i kapaampai kolidasan om kotundunan do tanak-anak diti,” ka disio.
Kohondot dilo’ ka di Halisah, bohogian disio mokianu waris toi nombo-nombo tulun i kotutun waris koinsanai tanak-anak dilo’ do momoromut disio id numbur 088-870509 t oi tumingan doid Upis Kotundunan watas Ranau.
“Iti montok manahak kointalangan i kouhup do Koupisan mogihum tina’ kopio do tanak-anak dilo’, suai ko’ monguhup Kuut momonsoi katatapan bobos osonong montok kopoiyanan om kotundunan tanak-anak dilo’,” ka disio pinopointalang.
