Dr. Joachim (gibang) minokinongou kopointalangan mantad di Chong om poingintong i Dexter (tanga’) ontok pinapaharo kinotombuluyan id koiyonon Projik Patung Mazu, Kudat.
KOTA KINABALU: Kumoduo Boyoon Montiri (TKM) po nogi’ Montiri Koporintaan Koiyonon om Pomuwalaian (KKTP), Datuk Seri Dr. Joachim Gunsalam pinapaharo kinotombuluyan doid koiyonon projik Patung Mazu id Kudat om miampai poinsosondiri’, kosokodung isio inggisaman montok monilombus koponuridongan dilo’.
“Miampai poinsondiri’, monokodung oku inggisaman diti sabab otumbayaan oku kapanahak ilo’ koundaran di osonong kopio kumaa rayat id Kudat om potilombus dino kapanahak gatang pomoruhang kumaa pomorunan ponombuluyan id pogun diti.
“Patung diti kosili iso’ po kointutunan potilombus dino kosili pongimbayat ponombuluyan id watas dilo’,” ka di Dr. Joachim.
Dr. Joachim (ko’onom, gibang), Chong (koturu’, wanan) om i Dexter (gibang) miampai koinsanai i nokotindapou doid kinotombuluyan dilo’.
Nakatanud disio id kinotombuluyan dilo’ i bagas Boyoon Montiri Sabah, Tan Sri Chong Kah Kiat i po nogi’ monontuduk kumaa projik koponuridongan patung dilo’, tongo’ lansanon koiyonon i kapaampai di Luguan Watas, Tongo’ Luguan Tanak Mamasok Pogun (KAN), Mobi’ Luguan Tanak Mamasok Pogun (WKAN) om tongo’ Kapitan Cina.
Pogulu diti, di toun nakatalib Potunud Eksekutif Kim Teck Cheong Consolidated (KTC) Berhad, Datuk Dexter Lau nokoumbal miniboros om minokianu mooi do koporintaan kaanu monilombus koponuridongan Patung Mazu dilo’.
Naamot dilo’, i Dexter minoboros, bohogian disio manahak sokodung ouli’ kumaa oinsanan bohogian i kogompit doid koponuridongan Patung Mazu.
Nokopogulu, Dr. Joachim suminasi’ Ababayan ‘Angkat Sumpah’ tongo’ Puru Kotinanan Kakadayan Kudat.
