Masiung (kotolu, gibang) suminasi’ kopomurutan undi lot i pinoindalan om poingintong io’ Flovia (koduo, wanan) dii Rosemary (wanan).
SOOK: Kotinanan Kopotundaan Pomuwalaian om Kakadayan (LPPB) minamaramit 41,135 upalai montok maganu walai gatang osiriba’ id Sabah id suang timpu limo toun gisom wulan Kotolu toun diti.
Ponorikohon LPPB, Datuk Masiung Banah minoboros, tintob dilo’ adalaan kasawat nung piadangon di ginumu’ walai i nopongo om mamaso poindalanon do bohogian disio.
“Noondot diti moningkanan tokou do monumboyo’ kopokionuan sokukuri’ 30 pihatus mantad ginumu’ upalai di naramit,” ka disio katalib pinopoimagon pinomurutan undi 32 lot walai gatang osiriba’ id Sook, di kosuabon konihab.
Poingkuro po ka disio, ilo’ nopo nga’ tumanud di ginumu’ poruntukan i patahakon do Koporintaan Pogun om Pisompuruan.
Tumanud di Masiung, bohogian disio babaino’ diti masaan mamalan puralan kaampai no monuridong Puruankuasa’ Strategik om Kopoopuan (JSP) montok monginsiriba’ ginumu’ kopokionuan walai gatang osiriba’ id Sabah.
Nokopogulu, ontok minoboros doid ababayan dilo’ ka disio, LPPB poinsodia’ monguhup manahak surupukaraja’ ponontudukan kumaa di mamaramit walai i osusa’ kaanu kapangalasan bank.
Masiung po nogi’ Mobi’ Rayat Kuamut minoboros, tikid upalai walai gatang osiriba’ maan tahaso’ tumanud kosudongan.
Yolo’ no i kiharo nindopuan paganakan siriba’ RM3,000 i kosudong mongupalai walai gatang osiriba’ i padagangon bobos osiriba’ gatang RM47,000 iso’ unit.
“Hilo’ id labus ogumu’ monguhot, nokuro walai gatang osiriba’ amu’ waalon id pososorili’ kakadayan. Iti nopo nga’ sabab no do gatang tana’ di akawas id kakadayan amu’ katampung gatang walai di omurah kopio,” ka disio.
Nokotindapou nogi’ i Monguhup Montiri Kopotundaan Mogigiyon om Kasasanangan Rakyat, Datuk Flovia Ng i po nogi ‘ADUN Tulid; Monijor Agayo LPPB, Rosemery Ahping om i Monguhup Upisor Watas Sook, Jeffry Japar.
