Azalina Othman Said
KOTA KINABALU: Koporintaan Perpaduan pointopot kohondot di hal ngaawi’ mamasok Sabah om minggisom montok papatantu’ kotoronongon, koburuon om koumoligan Sabah toririmo poinjamin, ka di Montiri id Koupisan Luguan Montiri (Undang-Undang om Reformasi Institusi), Datuk Seri Azalina Othman Said.
“Koporintaan Pisompuruan id siriba’ buruanon di Luguan Montiri, Datuk Seri Anwar Ibrahim om Nuludan Montiri amu’ popologos di bantug om koumoligan nogi’ amu’ tumingkod minggisom montok mongumolig om momogompi’ koponsolon, kinakabalon bantug om bantug Malaysia do potitikid timpu om tumilombus maganu nunu nopo laang i kiguno montok moningkod koponugatan Sultan Sulu miampai momoguno koinsanai kuasa’, kopotutan om intodonon di haro,” ka disio id iso’ kointalangan di tadau baino’.
Di tadau baino’, i Azalina miampai tongo’ upisor Koporintaan Pisompuruan mantad Bohogian Hal Undang-Undang (BHEUU), Koupisan Luyar Pogun (AGC) om mobi’ Sekretariat Pinotomod yolo’ nopo nga’ io’ Prof. Dautk Dr. Sundra Rajoo dii Datuk Feroz Hussein Ahmad Jamaluddin, pinapaharo Ababayan Kopointalangan Kokomoi Hal Koponugatan Bohogian Monondos Waris Kesultanan Sulu miampai Koporintaan Pogun Sabah om puru mogigiyon Sabah id Magellan Sutera Resort.
Ka di Azalina, kopointalangan diti miagal di pinaharo di konihab miampai di tongo’ Puru Parlimen mantad Blok Koporintaan om Blok Pembangkang montok popoindalan karait di koyuyuon kopohompit hal koponugatan diti om kinoburuon poinggompit laang undang-undang id apat kaganaan kuasa’ ilo’ nopo nga’ Sepanyol, Perancis, Luxembourg om Belanda.
“Suai ko ilo’, kopointalangan diti kituduan mokianu pomusarahan mantad mogigiyon Sabah i naantakan mitilombus,” ka disio.
