Dr. Jeffrey ontok minoboros doid Parlimen, Kuala Lumpur.
KOTA KINABALU: Koporintaan Pisompuruan pinokianu popoindalan kopogintongan kousinan pinotomod montok popoguli’ 40 pihatus kopotutan asil oborisi’ Sabah tumanud koundangan 112C, 112D om item 2(1) Bohogian IV Jadual Ko-10.
Puru Parlimen Keningau, Datuk Seri Dr. Jeffrey Kitingan minoboros, kopogintongan kousinan dilo’ apatut do mandatory pohoroon tikid limo toun nga’ amu’ nowonsoi pointonod di 1974.
“Hinombo 40 pihatus (kopotutan kousinan Sabah) solinaid 48 toun diti,” ka di Dr. Jeffrey po nogi’ Kumoduo Boyoon Montiri Sabah ontok pinibahasan id Parlimen, Kuala Lumpur.
Minokianu isio mooi do kopotutan kousinan 40 pihatus tumboyoon osikap om okon ko’ poruntukan no do toun-toun RM260 r iong montok Sabah om RM300 riong montok Sarawak.
Tumanud di Dr. Jeffrey, Sabah natagakan kuasa’ kinomordikaan maya’ pinonuridongan Malaysia soira’ Pisompuruan amu’ minomoduli’ kopogintongan dilo’ gisom nokoposili rayat Sabah nosubuanan mosikin.
Puru Parlimen Keningau dilo’ pinopointalang sosio ikonomi Sabah nosubuanan nakaraat soira’ tongo’ lansanon longkod minogowit parti-parti pulitik diolo’ kuminaa Sabah om minomorikurut nogi’ minongudar tulun songkosuayan Filipina om nogi’ Indonesia sabaagi mongungundi’.
“Miampai slogan ‘Demi Bangsa dan Agama’ (Montok Tinaru om Ugama’), lansanon longkod minumbal popoindalan ‘Social-Engineering’ id Sabah miampai minanahak dokumen mamasok minaya’ wawaya’an tohuri miagal id ruputan Royal Commission of Inquiry (RCI) 2014,” ka disio.
Dr. Jeffrey po nogi’ Puru Lintuhun Koundangan Pogun (ADUN) Tambunan potilombus dino minonondos di Luguan Montiri ontok dilo’ katama’ minonolikud Koundangan Sabah miampai pinopogisosowoli Boyoon Montiri tikid duo toun montok kuasa’ pulitik nga’ soira’ norikot gontok parti diolo’, aiso’ nogi pisowolianan.
Pinosotol disio, “Iti nopo nga’ susuyan kahandaman pulitik bobos otuong montok Sabah. Kalansanan ku susuyan miagal diti amu’ no oguli’.”
Tumanud disio, montok Sabah om Sarawak momogusa’ kinoburuon id Malaya, kousinan di korungod gunoon, kaadangon om mamantang pi’ilangan sabaagi tambalut kongsi minonuridong Malaysia.
Kohondot dilo’, Dr. Jeffrey minangatag kousinan kopotundaan tikid toun tumanud nisbah di lobi aadas 50:25:25 ilo’ nopo nga’ 50 pihatus monotk Semenanjung, 25 pihatus (Sarawak) om 25 pihatus (Sabah).
Suai ko’ kopotutan kousinan dilo’, potilombus dino minokianu isio mooi do poruntukan Pan Borneo Highway insikapan sabab i Tuanku Yang diPertuan Agong nokopolombus do angkba montok mamanau maya’ ralan agayo padarapas Sarawak-Sabah dilo’.
Dr. Jeffrey lumansan kaanu sokodung Koporintaan Longkod monotk popotunda’ ikonomi Sabah om Sarawak kopiongoi di kopoundolihan longkod pomogunan Indonesia mantad Jakarta kumaa Kalimantan Kosilahon.
