Hajiji minamaramit ‘Resolusi’ mantad di Datu Hishamuddin id Ababayan Kinopoimaganan Pompusan Konvensyen Mahasiswa GRS & Kinopoimpuunan Sayap Pelajar GRS, id Raia Hotel, Kota Kinabalu, di tadau baino’.
KOTA KINABALU: Boyoon Montiri, Datuk Seri Hajiji Haji Noor di tadau baino’ pinapahabar do momuruan songinan parti i ointutunan sabaagi Parti Gagasan Rakyat Sabah (Gagasan Rakyat).
Hajiji po nogi’ Ponorikohon Gabungan Rakyat Sabah (GRS) minoboros, parti dilo’ gunoon montok monilombus kopoburuan sabaagi parti nokoiyonon id pogun diti i rinamit do GRS sabaagi parti nomungan di ko 9tw Kohopod om Duo katatalib.
“InsyaAllah, poguraon tokou om monilombus kopoburuan tokou maya’ Gagasan Rakyat montok no kopotundaan rayat nogi’ pogun diti.
“Kohondot dilo’, talib diti aiso’ nodi koimbulai do mogisusuai hal montok mombohit nindikohon ku sabaagi Boyoon Montiri.
“I nopo oponsol, nakaanu oku sokodung majoriti mantad Puru Lintuhun Koundangan Pogun (ADUN) sabaagi Boyoon Montiri Sabah om babaino’ diti minomuruan oku songinan parti ilo’ nopo nga’ Gagasan Rakyat,” ka disio katalib pinopoimagon Ababayan Kopomupusan Konvensyen Mahasiswa GRS om Kinopoimpuunan Sayap Pelajar GRS id Hotel Raia, do hiti di tadau baino’.
Minonimbar ponguhotan, ka di Hajiji, Gagasan Rakyat nopo nga’ parti di haro mantad om babaino’ diti sinowoli om buruanon disio.
GRS do noondo kiharo limo parti id nomungan dilo’ ilo’ nopo nga’ Parti Gagasan Rakyat (Gagasan Rakyat); Parti Bersatu Sabah (PBS); Parti Solidariti Tanah Airku (STAR); Parti Maju Sabah (SAPP) om Kotinanan Kabansaan Sabah Bersatu (USNO).
Pogulu dilo’ id boboroson disio, pinopolombus i Hajiji kosuayan disio di koulalaho’ do pipiro bohogian i kakal amu’ osontob ginawo di kopoindalanan karaja’ disio.
“Osuayan oku om nokuro nanamot do minongulud tokou pogun miampai osonong. Nga’ oilaan ku, oinsanan diti okon i ko’ sabab do amu’ tokou nokopongulud do pogun, nga’ haro kopurimanan agayo gaab om tamaha’ do nindikohon.
“Poingkuro po, otumbayaan oku di sokodung rayat om sabab no do nakaanu tokou pinopowonsoi di bobos osonong montok timpu dumontol Sabah, kaanu tokou monoibau koinsanai kaantaban id pomorintaan diti,” ka disio.
Kokomoi do ababayan dilo’, pinopolombus i Hajiji kounsikohan mantad kinopongonjuran konvensyen dilo’ om mokianu oinsanan mahasiswa kaampai yolo’ i kiumur 18 toun poingkawas kiharo toilaan kokomoi koyuon om kopoburuan pulitik id pomogunon diti kaampai no id Sabah.
“Kohondot dilo’, mimang oku lobi kogumu’ mahasiswa Sabah id kotinanan pinsingilaan akawas (IPT) koporintaan toi praivet poliliput pomogunon pogompiton id ababayan i poindalanon do Sayap Pelajar GRS.
“Maya’ kogompitan diolo’ id ababayan miagal diti, koporintaan lobi koilo koinsanai korohian toi pokionuon i polombuson do sukod wagu,” ka disio.
Hajiji minoboros, suai ko’ konvensyen diti, koporintaan pogun pinoposodia’ mogisusuai posunduran kumaa suusmikul montok popoilang angkab nogi’ popolombus kopotutan diolo’.
“Wookon nopo nga’ kopongonjuran Kounsol Pirundingan Susumikul Sabah (MPPS) om Sekretariat Mahasiswa Sabah Malaysia (SEMESTA). Oinsanan diti kopokito kopongokunan koporintaan kumaa sukod wagu lobi-lobi no susumikul.
“Sabaagi Boyoon Montiri, sorisidon ku om maganu kopomodulianan pointopot di tikid hal i paatagon montok koundaran toinsanan kaampai no maya’ konvensyen diti,” ka disio.
Kohondot dilo’ minoboros i Hajiji, koporintaan pogun pinopoobi’ soginumu’ RM16.42 riong id Bajet 2023 montok popoindalan Ababayan Kopotundaan Kopomuruanan Komulakan i kopuli do ababayan ‘kesukarelawanan’ om pisompuruan sosiol.
“Koinsanai diti nopo montok mongimbulai lansanon komulakan di akawas kabaahan, kalansanan ku sukod wagu tokou maganu kosiwatan di koinsanai inggisaman i pinosodia’ do koporintaan sabab oinsanan dokoyu nopo nga’ tataba’ i kiguno onuan kosiwatan id kopotundaan ikonomi pogun,” ka disio.
Nangatan nogi’ disio tongo’ mahasiswa do tumilombus manahak sokodung kumaa koporintaan id inggisaman mogowit Sabah lobi koburu’ om kotunda’ nogi’ papalantoi Rikoton Sabah Maju Jaya.
Nokotindapou nogi’ i Presiden PBS, Datuk Seri Dr. Maximus Ongkili; Presiden USNO, Tan Sri Pandikar Amin Mulia om i Kumoduo Presiden STAR, Datuk Ellron Alfred Angin nogi’ i Ponorikohon Manakadai Sayap Pelajar GRS, Datu Hishamuddin Datu Hasim.
Hajiji om tongo’ lansanon GRS di suai guminambar miampai wookon susumikul i nokotindapou kopihondot Ababayan Kinopoimaganan Pompusan Konvensyen Mahasiswa GRS & Kinopoimpuunan Sayap Pelajar GRS, id Raia Hotel, Kota Kinabalu, di tadau baino’.
