Hajiji Haji Noor
RANAUa: Koporintaan Pogun tumopot montok tumilombus manahak sokodung om ponguhupan kumaa mogigiyon mogisusuai tinaru om ugama’ id pogun diti montok mamaramai kararamaian sompoopori.
Boyoon Montiri, Datuk Seri Hajiji Haji Noor minoboros, kopiongoi dilo’ Koporintaan Pogun pinopoobi’ ponguhupan soginumu’ RM1.5 riong do toun diti montok minangaba’ tulu mondou id poliliput Sabah.
“Toluod diti nga’ kalansanan nogi’ do koposindak kinaramayo’ Toun Wagu Sina’ id nayatan mogigiyon Tiong Hua id watas diti,” ka di Hajiji.
Daamot dilo’, id Bajet 2023 Sabah, koporintaan pinopoobi’ soginumu’ RM176.16 riong montok popoindalan ababayan kougamaan om kerohanian id pogun diti.
Soginumu’ RM54.05 riong nopo nga’ pinanahak kumaa sikul ngaawi’ om koburuon tongo’ tinan kougamaan okon Islam ilo’ miampai kinoinsawaton kousinan soginumu’ RM7.05 riong do toun diti.
Hajiji minoboros, kinoinsawaton diti nga’ kopokito nogi’ do koporintaan pogun opusou om pointopot doid koponguhupan mogigiyon id Sabah amu’ momuntuk tinaru om ugama’.
“Kohondot dilo’, kopihondot toun wagu diti mimang oku oinsanan rayat pogun diti kaampai mogigiyon Tiong Hua tumilombus miampai do koporintaan montok popotunda’ om popoburu’ pogun diti, mooi do Sabah kotilombus koburu’,” ka disio.
