Dr. Joahcim (kotolu, gibang) ruminamit tandamato mantad di Jonnybone, om poingintong ii Samad (gibang), Masiung (koduo, gibang) om i Celestina (kotolu, wanan) id kinapamaramaian karamaian Ramai Kaamatan Nayatan Watas Telupid.
TELUPID: Koporintaan tumilombus popoindalan tongo’ ababayan montok monguhup mongingkawas sinonong om rontob koposion mogigiyon id watas diti, ka di Kumoduo Boyoon Montiri, Datuk Seri Dr. Joachim Gunsalam.
Okito disio Telupid kikosiwatan montok poburuon sabab no do kinoiyonon dilo’ sabaagi watas piwolitan id koporomut Kota Kinabalu om Sandakan.
Ka disio, ababayan ngaawi’ diti miamapi mitilombus kouhup papasarok po do ikonomi watas diti.
Dr. Joachim po nogi’ Montiri Koporintaan Koiyonon om Pomuwalaian minoboros dilo’ ontok pinopoimagon Ramai Kaamatan Nayatan Watas Telupid i pinaanjur id Lintuhun Mogigiyon Telupid, di sogkonihab (19tw Kolimo).
Dr. Joachim (koduo, wanan) pinopoindalan ababayan ‘mongomot’ parai miampai di Samad (kotolu, gibang), Masiung (kaapat, gibang), Celestina (kotolu, wanan) om i Jonnybone (wanan) kopihondot karamaian Ramai Kaamatan Nayatan Watas Telupid.
Kalansanan disio oinsanan i mamaramai Ramai Kaamatan mamarati uhu karamaian toun diti ilo’ nopo nga’ Kaamatan Mongubasanan Pisompuruan, minoboros isio, uhu dilo’ kopiongoi di inggisaman koporintaan id koponompuruan tinaru Kadazandusun, Murut om Rungus (KDMR) miampai tongo’ tinaru suai i haro id pgoun diti maya’ karamaian Ramai Kaamatan diti.
“Kaamatan nopo timpu montok dati’ tumimung om oinsanan mamaramai kounsikohan kumaa Tuhan mantad asil’ nomot toi ko’ karaja’ tokou toun diti.
“Kopiongoi di uhu do toun diti, Kaamatan Mongubasanan Pisompuruan kanau monompuru dati’ toinsanan amu’ momuntuk okoro’ agayo, nolohing om omulok mantad koinsanai nayatan mogigiyon,” ka disio.
Dr. Joachim (id tolikud kaapat, gibang) om tongo’ talap suai guminambar pongingitanan miampai Bontugan Unduk Ngadau Kaamatan Nayatan Watas Telupid, Doren Olivia Gilbert (tanga), nakalantoi taang koduo, Magdalena Dinoh (gibang) om i nakalantoi taang kotolu, Malshanna Trixie Ellixius (wanan).
Dr. Joachim minonongkounsikou nogi’ kumaa Puru Lintuhun Koundangan Pogun (ADUN) Telupid i po ogi’ Monunurat Pulitik kumaa Komontirian Koporintaan Koiyonon om Pomuwalaian, Jonnybone J. Kurum mantad kinopoindalanan kinapamaramaian Ramai Kaamatan Watas Telupid.
Nokotindapou nogi’ i Monguhup Montiri Koburuon Labus Kakadayan Pogun Sabah po nogi’ ADUN Labuk, Samad Jamri; Ponorikohon Kotinanan Koburuon Pomuwalaian om Kakadayan (LPPB) po nogi’ ADUN Kumaut, Datuk Masiung Banah; Upisor Watas Telupid po nogi’ Ponorikohon Puruankuasa’ Manganganjur karamaian Ramai Kaamatan Nayatan Watas Telupid, Celestina Jetony; tongo’ luguan koupisan, Ponorikohon KDCA Watas Telupid, lalansanon kampung om ponorikohon JPKK.
