Boyoon Montiri, Datuk Seri Haji Hajiji Haji Noor om Montiri Sains Teknologi om Inovasi, Datuk Dr. Mohd. Ariffin Mohd. Arif suminasi’ kinapatahakan toluod mantad Kumoduo Molohingon Kounsol Ugama’ Islam Sabah, Ustaz Malai Ali Malai Ahmad kuminaa di Molohingon USIA, Datuk Sapawi Haji Ahmad id ababayan kinopoimaganan Forum Malaysia Madani: Keharmonian dalam Kepelbagaian id SICC, Kota Kinabalu, di konihab.
KOTA KINABALU: Boyoon Montiri, Datuk Seri Haji Hajiji Haji Noor mimang do konsep Malaysia Madani oroh\tian om opointalangan miampai poinpuli do rayat pogun diti.
Ka disio, konsep dilo’ kiguno pointalangan miampai po’ompus om sorisidon miampai ‘ilmiah’ di tongo’ abaal id mogisuaian kaganaan miampai popisawit di koyuyuon kopogisusuaian i kopihunung do pomogunan tokou kosuul no id Sabah.
Tumanud disio, konsep Malaysia Madani i pinomusarahan di Luguan Montiri, Datuk Seri Anwar Ibrahim siniuunan sabaagi iso’ kotontuan wagu montok pogun mongulud rikoton do katatapan om kopoindalanan karalanon, i kadarapas oinsanan siktor montok koburuon, kalantaion om kasasanangan pomogunan di koupusan.
“Inggsaman montok mamarati konsep diti oponsol kopio sabaagi poimpahan kumaa dati’ toinsanan montok monsupu’ kosindakon wagu di lobi koulud, asanang, aadang om koburu’. Kohondot dilo’, konsep diti kopiongoi kopio di koyuon om kogugunoon id pogun diti i kiharo lobi 30 tinaru,” ka disio.
Minoboros isio dilo’ ontok pinopoimagon Forum Malaysia Madani: Pogiuludan id Pogisusuaian doid Longkod Konvensyen Sompomogunan Sabah, SICC, do hiti, di konihab.
Forum dilo’ pinaanjur do Kotinanan Islam Poliliput Sabah (USIA) miampai Upis Kumoduo Monunurat Koporintaan Pogun (Karaja’-karaja’ Pinotomod).
Hajiji minoboros, konsep Popotunda’ Malaysia Madani i kapaampai do onom tukod poimpahan ilo’ nopo nga’ M (keMampanan), A (kesejAhteraan), D (Daya Cipta, A (hormAt), N (keyakiNan) om I (Ihsan), kopiongoi di Palan Kopotundaan Hontolon Sabah Maju Jays (SMJ) i pinointutunan do koporintaan pogun soira’ nopo disio minomuruan koporintaan Sabah di wulan Kosiam 2020.
Monongkoondos nogi’ isio sabab Sabah nopo nga’ pogun i osopung pinapaanjur seminar om forum kopohompit Malaysia Madani montok mongilo om popoindalan angkab agayo i pinointutunan di Luguan Montiri.
Ka disio, wulan katatalib Seminar Popotunda’ Malaysia Madani Mantad Pomurotian Nokoiyonon id Sabah pinaanjur do ‘Wadah Pencerdasan Umat Malaysia’ (WADAH) Pogun Sabah, Institut Darul Ehsan (IDE) om Angkatan Komulakan Islam Malaysia (ABIM) Pogun Sabah, doid pogun diti.
“Otumbayaan oku do haro po koisaan, tongo’ tinan okon koporintaan (NGOs) om bohogian Institut Pinsingilaan Akawas (IPT) Porinta’ om IPT Swasta kaampai no kotinanan koporintaan, i papaanjur seminar, forum om bingkil i kopointalang lobi karalom om mamarati Konsep Malaysia Madani montok koundarang tongo’ puru ngaawi, tongo’ susumikul, graduan om pakakaraja’ koporintaan,” ka disio.
Minoboros i Hajiji, sundung USIA nopo nga’ songinan kotinanan Islam, nga’ tonggungan dau id koponguhupan inggisaman koporintaan popoindalan ababayan i kikoundaran kumaa rayat amu’ momuntuk tinaru om ugama’, apatut sokodungon do oinsanan bohogian.
Kalansanan disio USIA kotilombus koburu’, okon ko’ kotundunan nopo nga’ dakwah, nga nogi’ aparagat id mogisuai kaganan, monguhup koporintaan id kopomogompian piuludan tinaru, koburuon pogun om kasasanangan koposion rayat.
“Bayahan kumaa USIA tilombuson no karaja’ perbengkelan miagal diti i agayo koundaran kumaa koinsanai puru om mogigiyon,” ka disio.
