Dr. Joachim (kotolu, wanan) pinapatahak kunci kadai runcit kuminaa di Razil Zakaria i nokoulud id Ababayan ‘Pembasmian Kemiskinan Tegar’ id sahau Unit Palan Kopotundaan Pisompuruan (EPU), om sinasi’ di Jumain (koduo, wanan) di konihab.
RANAU: Koporintaan tumilombus papatantu kopotundaan infrastruktur poindalanon kosuul no montok rayat id Lintuhun Koundangan Pogun (DUN) Kundasang.
Kumoduo Boyoon Montiri i po nogi Puru Lintuhun Koundangan Pogun (ADUN) Kundasang, Datuk Seri Dr. Joachim Gunsalam minoboros dilo katalib minokinongou kopointalangan montok duo projik ilo nopo nga projik Monginsonong Ralan Terawas-Malinsau-Kaingaran om Projik Mmonsoi Ralan kumaa Mini Estet Sejahtera (Mesej) Mansalu Ranau, Fasa II.
Kopointalangan pinatahak di Injinior Watas, Erwana Farhanah i pinoindalan doid Lintuhun Kampung Meridi, Kaingaran, do hiti.
Montok projik monginsonong ralan, ilo’ kapaampai ninaru 39.515 kilometer talun-alun duo waya’an iso’ ralan miampai pomomonsoi sitandod R2 JKR.
Projik diti mintonod mantad Kg. Terawas om padarapas pipiro kampung gisom opupusan id Kg. Kaingaran. Timpu projik nopo nga 36 wulan.
Soginumu 17 kampung i kaanu koundaran mantad kapamansaian talun-alun diti wookon nopo nga Kg. Timbua, Kg. Merungin 1 om Merungin 2, Kg. Pinampadan, Kg. Tumbalang, Kg. Kepuakan, Kg. Mokodau, Kg. Malinsau, Kg. Mempakot, Kg. Mengkapoh, Kg. Wayan, Kg Sinurai, Kg. Tinaum, Kg. Meridi om Kg. Pinupudan.
“Otumbayaan oku do iti nga’ noupalai di lansanon pogulu i doho’, ilo nopo nga kogogonopan infrastruktur montok rayat. Yati’ toinsanan minggisom kumaraja montok papatantu rayat kaanu kogogonopan di poinpatut kopio,’ ka di Dr. Joachim.
Ka disio, skop karaja di owonsoi mantad projik diti nopo nga’ kapamansaian wokok posoborong baang, palu om luluyungon waig.
Suai ko ilo’, karaja’ kopoinsiribaan tisan, koponguntunan, koponondulian om pongumoligan tisan otungab nga poindalanon.
Kohondot dilo’, asil mantad koponginsonongan haro nogi pipiro jambatan di wonsoiyon ilo nopo nga duo jambatan kininaru 40 meter, duo jambatan kininaru 75 meter om iso jambatan kininaru 30 meter.
Naamot projik kapamansaian ralan kumaa Mesej Mansalu Ranau (Fasa II) kapaampai sinodu’ 70.540 KM.
Soginumu turu’ kampung kaampai ilo’ nopo nga mimpuun mantad Kg. Singgaron Baru, Kg. Langsat, Kg. Kirokot, Kg. Koboi Timbua om Kg. Kawi.
Dr. Joachim i po nogi Montiri Koporintaan Nokoiyonon om Pomuwalaian lumansan oinsanan mogigion do hiti misokodung miampai tongo’ popoburu’ i kaampai id kapamansaian talun-alun.
Tumanud disio, iti nopo nga wookon angkab om rikoton disio solinaid disio nosili mobi’ rayat id DUN Kundasang.
Daamot dilo, Upisor Watas Ranau, Jumain Abdul Ghani monongkounsikou tu’ katalib minongindad solinaid turu’ toun om nakaanu nogi do ralan wagu.
“Bohit mantad mogigiyon Ulu Sugut nosimbar dii,” ka disio.
Lumansan nogi isio mogigiyon nokoiyonon kaanu manahak kosokodungan poinponu’ montok papatantu’ kopoindalanan projik diti oturundus.
Goduduo projik diti nowit di toun 2916 om kolulusan naanu di toun 2020, naamot kapamansaian kotimpuun do toun 2023. Kos koinsanai projik nopo nga’ RM657,499,551.
Nokotindapou nogi i Upisor Eksekutif Kounsol Watas Ranau, Jupirin Hj. Ruhimin; Monguhup Momuhu Asil Tana’ (PPHT), Jaidi Adrian; Monunurat Pulitik kumaa Dr. Joachim, Yubidi Gumpoyo; Lansanon Kopotundaan Mogigiyon (PPM), Dounis Sani; tongo’ mongongobi’ Luguan Tanak Mamasok Pogun (WKAN), Luguan Tanak Mamasok Pogun (KAN), tongo’ molohingon kampung om Ponorikohon Puruankuasa Kopotundaan om Koumoligan Kampung (JPKK), duo Popoburu’ Pomuwalaian Misi Maju Sdn. Bhd. i nobian di Larry Arif om Perwira Progresif i nobian di Debbie Pinjinus; om luguan koupisan id watas Ranau.
