Ewon Benedick
KOTA KINABALU: Bajet 2023 ki’uhu ‘Membangun Malaysia Madani’ (Popotunda’ Malaydia Madani) i pinawalad di konihab komoyon do osuau kopoburuan mikro, okoro’ om gonsuhatan (PMKS).
Iti kapagarasan siktor diti i koponoluod kumaa 38 pihatus kolobusan suang pgoun kasar (KDNK) om 48 pihatus ginoris karaja’ id nayatan mamasok Malaysia, ka di Montiri Kopotundaan Mongungusaha’ om Koperasi Malaysia, Datuk Ewon Benedick.
“Mongunsikou oku kumaa di Luguan Montiri mantad kopodulianan pinopolintuhun gontob sukai PMKS mantad 17 pihatus kuminaa 15 pihatus i kapanahak kopogkikiran kumaa 150,000 mamambayar sukai PMKS,” ka disio ontok minongomi Bajet 2023 i pinawalad di Luguan Montiri, Datuk Seri Anwar Ibrahim id Parlimen, Kuala Lumpur, di song konihab.
Minongunsikou nogi’ isio kopodulianan di Luguan Montiri kumaa tinimungan papadaadagang om mongingindapu’ okoro’ miampai pinoposodia’ kousinan pinotomod soginumu’ RM50 riong pomonsoi wagu sinusulap padadagangan id poliliput pogun om nogi’ kousinan pinotomod RM176 irong montok kogogonopan monginsonong premis om kogogonopan pongindopuan id siriba’ MARA, DBKL, PUNB om UDA Holdings i po nogi’ kotinanan id siriba’ komontirian disio.
“Mongunsikou oku nogi’ kopodulianan di Luguan Montiri pinoposodia’ mogisusuai skim kogogonopan kapangalasan om jominan kapambayaran mongungusaha’ PMKS miampai koinsanai dana soginumu’ RM1.7 bilion kaampai RM330 riong skim ponguhupan modal i pawaya’on kumaa TEKUN Nasional (kotinanan komontirian) kaampai RM10 riong pinotomod montok monguhup komulakan mantad paganakan osusa’ maganu nindopuan maya’ pongindopuan, RM300 riong pinotomod montok monokodung pongindopuan mikri om mongungusaha’ koonduan om komulakan nogi’ RM1 bilion maya’ Bank Simpanan Nasional montok kapamalanjaan PKS mikro om mongingindapu’.
“Mongunsikou oku nogi’ kopodulianan di Luguan Montiri papagaras PMKS miampai sokodung ababayan ‘automasi’ om ‘pendigitalan’ pongindopuan miampai kousinan soginumu’ RM100 riong id siriba’ Skim Geran Pendigitalan PKS om mongingindapu’ okoro’ montok geran padanan soginumu’ RM5,000 om nogi’ kousinan soginumu’ RM1 bilon maya’ Bank Negara Malaysia montok monguhup PMKS popoautomasi kopoindalanan pongindopuan om kopodigitalan kopoindalanan,” ka disio.
Id kotorinaan dau, Komontirian pinosodia’an RM732 riong id bajet toun diti, ilo’ nopo nga’ RM520 riong pabalanjaan kopotundaan om RM212 riong pabalanjaan mongulud. Iti nokoposurat kinopomoruhangan RM182 riong nung piiradon bajet toun nakatalib, kosuul no id pabalanjaan kopotundaan i noruhangan soginumu’ RM165 riong.
Ewon minoboros, pinomoruhangan pabalanjaan kopotundaan Komontirian i pinatahak di Luguan Montiri kopokito tonggungan agayo disio id inggisaman mononduli’ om papagaras siktor PMKS pogun i poindalanon do komontirian om tongo’ kotinanan komontirian.
“Yahai id Komontirian diti tumilombus kumaraja’ agaras papatantu’ poruntukan diti korikot kumaa tinimungan PMKS tumanud kopoindalanan oulud MADANI. Kiangkab oku nogi’ do papatantu’ kopoindalanan pongupalaian om kapatahakan skim ngaawi’ pamalanjaan diti oinsanangan mooi do tinimungan PMKS karamit do surupukaraja’ Komontirian om tongo’ kotinanan Komontirian i osusau PMKS.
“Montok diti tilombuson ku kopogompitan surupukaraja’ om ababayan miruba’ miampai tongo’ mongungusaha’ PMKS montok mongilo di gunoon, kobolingkahangan nogi’ atag diolo’ om id timpu di miagal papagaras pisokodungan tiim id komontirian mooi di kapanahak surupukaraja’ Madani,” ka di Puur Parlimen Penamapng om ADUN Kadamaian dilo’.
Sabaagi Mobi’ Rayat mantad Sabah, i Ewon minongunsikou nogi’ tonggungan di Luguan Montiri minanahak kopoobian kopotundaan infrastruktur kosuul no Sabah soginumu’ RM6.5 bilion ilo’ nopo nga’ agayo pisuayan nung piadangon di pinosodia’ do koporintaan ngaawi’ nokopogulu.
“Luguan Montiri nga’ tumopot nogi’ monginsonong gontob Kapanahakan Pinotomod kumaa Sabah om popoinsikap pibarasan karait karalano’ wagu montok mongolon piokunan ‘interim’ di poinharo mantad.
“Montok diti, nokoboros ku kumaa di Nuludan Montiri atag poposili kopomuhuan sukai pisompuruan id Sabah sabaagi poimpahan pongintoban formula Kapanahakan Pinotomod dilo’ om pinopoilo nogi’ do nuludan montiri ku id pialatan ADUN Pakatahan Harapan (PH) Sabah i minonimpuun Saman Ponimpuun (Originating Summon) id Kuut Akawas montok monugat panalasaian lobi kosonong kokomoi Kapanahakan Pinotomod kumaa Sabah id siriba’ Perkara 112C Koundangan Pisompuruan,” ka disio pinopointalang.
“Suai ko ilo’, minongunsikou nogi’ isio tonggungan di Luguan Montiri monginggumu’ kogogonopan kolinik manau-panau, bank manau-panau om kuut manau-panau id Sabah.
“Pogulu diti noumbalan ku poboros kumaa Nuludan Montiri mooi do poposodia’ kousinan pinotomod montok monguhup ababayan Kuut Manau-Panau (Mobile Court) id Sabah soira’ pinoilo di bagas Luguan Hakim Pogun, Tun Richard Malanjum do po’ompus disio pinopointutun ababayan kuut manau-panau dilo’, aiso’ kinopoopian kousinan pinotomod pinosodia’ do koporintaan di ontok dilo’.
“Sabaagi Puru Parlimen P174 Penampang om ADUN N11 Kadamaian, tilombuson ku mogowit angkab rayat id watas di obian ku id mitingan Nuludan Montiri montok hal ngaawi’ i kiguno owiton kumaa nuludan diti om nogi’ kumaa koombolutan Nuludan Montiri Koporintaan Perpaduan mooi do kogogonopan om kopoobian kousinan Komontirian diolo’ nga’ aramit do rayat Penampang om Kadamaian,” ka disio.
