Hajiji miampai dii Masidi, safar, Mongunguhup Montiri om upisor totuo kopointaan pogun ontok tuminanud kinapawaladan Bajet Pogun 2023 id Seri Gaya di song konihab.
KOTA KINABALU: Bajet Pogun 2023 kopokito tonggungan Koporintaan Perpaduan Pisompuruan montok monginsonong koyuon kousinan pogun i manamong kogugunoon rayat do poinpuli.
Sabah mamaramit osonong 12 inggisaman Bajet Malaysia Madani i pinahabar di Luguan Montiri, Datuk Seri Anwar Ibrahim i po nogi’ Montiri Kousinan doid Parlimen di konihab, ka di Boyoon Montiri, Datuk Seri Hajiji Haji Noor katalib tuminanud do kinapawaladan Bajet dilo’ mantad Seri Gaya do hiti.
“Mongunsikou tokou di kopoobian RM6.5 bilion montok Sabah, ilo’ nopo nga’ kikiro 3.1 pihatus lobi ko’ mantad ginumu’ i pinoobi’ id Bajet kolimpuunon 2023 i pinawalad do Koporintaan Pisompuruan pogulu diti,” ka disio.
Suai ko ilo’, RM2.5 bilion po pinoobi’ montok Sabah om Sarawak do popoindalan projik kogogonopan ginumuan miagal talun-alun, sumbu ralan, pangaba’ lotirik om waig.
“Mongunsikou kopio yahai tonggungan Koporintaan Pisompuruan montok monginsikap lobi 1,000km projik Pan Borneo Sabah – Sabah Sarawak Road Link miampai pinopoobi’ RM20 bilion,” ka di Hajiji.
I Anwar minonuhu’ di Kumoduo Luguan Montiri II, Datuk Fadilah Yusof montok mogintong hal dilo’ do papatantu’ projik Ralan Agayo Pan Borneo amu’ kotilombus pogiboborosan id tikid pitimungan Bajet montok 20 toun dumontol.
Boyoon Montiri nga’ minongunsikou nogi’ kinoposotolan di Anwar karait tonggungan Koporintaan Pisompuruan montok papatahak kopolulusan projik pisompuruan id siriba’ RM50 riong kumaa koupisan teknikal id Sabah om Sarawak.
Karait tonggungan di Anwar montok popoinsikap koponoibahan tinimungan ‘miskin tegar’ id pomogunan diti maya’ Inggisaman ‘Pendapatan Rakyat’ (IPR) toun diti, ka di Boyoon Montiri, ilo’ iso’ laang di osonong om timpu di miagal lumansan kopoindalanan IPR di opulokis mooi do kosigampot tuduan.
Boyoon Montiri minongunsikou nogi’ tonggungan di Luguan Montiri do poruntukan RM1 bilion monotk Sabah om Sarawak kaampai kapamansaian kogogonopan Kositum, Imigrisin, Kuarantin om Koumoligan (CIQS) id kakadayan piwolitan doid Kalabakan sabaagi monoguang kopoundolihan longkod pogun Indonesia kumaa id Kalimantan.
“Sundung ingkaa, Sabah nga’ tumilombus nogi’ mononsog montok kapamansaian kogogonopan miagal id Bantul, Pensiangan,” ka disio.
I Boyoon Montiri monongkounsikou om mongilo koposotolan do Koporintaan Pisompuruan kohondot di kopongingkawasan koumoligan miampai kinopomoruhangan 42 pos koumoligan id piwolitan kaampai id koiyonon Watas Koumoligan Pinotomod Tisan Kosilahon Sabah (ESSCom), o wookon.
Miampai disio nopo nga’ i Montiri Kousinan, Datuk Seri Masidi Manjun, Monunurat Koporintaan Pogun, Datuk Seri Sr. Haji Safar Untong, Monunurat Pointatap Kousinan, Datuk Sofian Nair, Luguan Potunud Koupisan Surupukaraja’ Koporintaan Pogun, Datuk Rosmadi Sulai, tongo’ mongunguhup montiri om upisor totuo koporintaan pogun.
