Dr. Joachim Gunsalam om i Ellron Alfred Angin.
KOTA KINABALU: Koinsanai 13 Puru-puru Lintuhun Koundangan Pogun (ADUN) Parti Bersatu Sabah (PBS) om Parti Solidariti Tanah Airku (STAR) potilombus ogirot miampai om monokodung di Boyoon Montiri, Datuk Seri Hajiji Haji Noor.
Iti pinointalang di Kumoduo Presiden PBS, Datuk Seri Dr. Joachim Gunsalam om Kumoduo Presiden STAR, Datuk Ellron Alfred Angin ontok rinubaan id ababayan kinapatahakan tulu mondou kumaa tongo’ koisaan om tokong ngaawi’ Cina id Sabah i pinaharo doid Magellan Sutera Harbour, do hiti di tadau baino’.
Nuhot yolo’ karait di haro o bohogian angatantu’ i minonondos do nakaanu sokodung lobi pitanga’ mantad ADUN Sabah montok papasaga’ tinimungan diti monuridong iso’ Koporintaan Pogun di wagu.
“Koinsanai ADUN PBS monokodung Datuk Hajiji 110 pihatus,” ka disio.
Nuhot nung kopuriman isio kiguno wonsoiyon atag undi otumbayaan id Lintuhun Koundangan Pogun (DUN) Sabah, ka di Dr Joachim i po nogi’ Kumoduo Boyoon Montiri minoboros, aiso’ kogunoon montok popowonsoi dilo’ nga’ nung kiguno, otumbayaan isio do kalantoi i Hajiji.
“Aiso’ kogunaan montok momonsoi atag undi otumbayaan id DUN, nga’ nung kiguno, otumbayaan oku do kalantoi tokou,” ka disio.
“Yolo’ (bohogian ngaawi’ poinggompit) mumbal do momiraag ginirot koporintaan, nga’ gigisom nopo di noilaan tokou, tilombuson tokou popowonsoi karaja’ tokou om, nung kiguno, intangan tokou nogi’ nunu i maan tokou powonsoiyo’ mintonod do hilo’,” ka disio kawagu.
Kosokodung do PBS, Ellron minoboros, STAR toririmo otiu’ monokodung di Hajiji.
“Montok do STAR, ADUN-ADUN STAR, oinsanan otiu’ om monokodung Hajiji,” ka disio.
Nuhot nung noromut isio nombo-nombo boogian di poinggompit, ka disio, aiso’ po.
“Pikikiro doti’ do amu’ yolo’ katama’ sabab yati’ otiu’ kumaa di Datuk Seri Hajiji. Mantad dilo’, kada’ no umbal-umbal, otiu’ tokou kumaa disio (Hajiji),” ka di Ellron po nogi’ Montiri Komulakan om Sipoot.
PBS om STAR sopipoopori haro turu’ om onom ADUN.
Di konihab, Monunurat Agayo Gabungan Rakyat Sabah (GRS), Datuk Seri Masidi Manjun pinapabanta’ haro boogian atantu’ i minonondos do nakaanu sokodung lobi pitanga’ mantad ADUN Sabah montok papasaga’ tinimungan diti monuridong songinan Koporintaan Pogun di wagu.
“Montok kopoilaan, Datuk Seri Panglima Haji Hajiji Haji Noor, Boyoon Montiri Sabah nakaramit kookunan om sokodung mantad majoriti agayo ADUN Sabah montok tumilombus momuruan Koporintaan Pogun di haro do noondo.
“Yolo’ kaampai no koinsanai turu’ ADUN Pakatan Harapan Sabah,” ka di Masidi, i minanahak jominan koyuon om nindikohon pulitik id Sabah kakal ogirot om oumolig montok pitorinaan pongindopuan om kopoopuan.
Id hal di poinggompit, turu’ ADUN PH Sabah kikatatapan do papatantu’ kaadangon pulitik Sabah om amu’ monokodung koporintaan i turidongon maya’ wawaya’an likud.
ADUN ngaawi’ PH Sabah dilo’ nopo nga’ ii Datuk Christina Liew (Api-Api), Datuk Fung Ming Poon (Tanjung Papat), Datuk Ewon Benedick (Kadamaian), Phoong Jin Zhe (Luyang), Jannie Lasimbang (Kapayan), Tan Lee Fatt (Likas) om i Peto Galim (Inanam).
“Yahai miontong pointopot koyuon pulitik id Sabah om pinapaharo pinibarasan sompipi’ ADUN PH Sabah soginumu’ turu’ tulun karait do koyuon maso-maso diti.
“Orohian yahai popoilo do amu’ insan kapanahak ‘akuan bersumpah’ monokodung nombo-nombo boogian katalib toun 2020,” ka diolo’ maya’ kopointalangan media di tadau baino’.
