Jamawi (tanga’), Dr. Mary (gibang) om ilo suai minokinongou kopointalangan mantad di Leonard.
KOTA KINABALU: Komontirian Pomutanaman, Ponginsadaan om Pomorunan Akanon (MAFFI) papaharo sesi kopohompitan pinotomod miampai mongungusaha’ manuk, mongungudar om moomoguno id timpu toruhai montok monoibau kobolingkahangan gatang manuk nogi’ tonggungan tulun tanga’ id piromutan pangaba’.
Montiri dilo’, Datuk Jamawi Jaafar minoboros, sesi dilo’ pikikiro pohoroon pogulu pamaramaian Krismas, katalib opupusan Pitimungan Lintuhun Undangan Pogun (DUN).
“Papaharo tokou kopohompitan ponguludan do osisikap diti. Nung kaanu, pogulu Krismas. Manu tokou mindikau somija miampai mongungusaha’, mongungudar om nogi’ moomoguno montok mogihum panalasaian bobos osonong,” ka disio soira rinubaan ontok pinaharo kotombuluyan apantang kuminaa Koupisan Surupukaraja’ Veterinar Watas Kota Kinabalu do hiti di tadau baino’.
Minananud disio i Monunurat Pointatap MAFFI, Datuk Leonard Stephen Poyong.
Jamawi minoboros, wookon haal di pogibabarasan nopo inggisaman mongingkuri’ karaja’ tulun tanga’ i komoyon nosili intodonon gatang manuk nokoiyonon lobi kasawat nung piadangon di manuk nudar.
“Umbalan tokou mongingkuri’ kohompitan tulun tanga’. Soira’ gatang manuk nokoiyonon lobi kapagon, moomoguno momili’ manuk nudar. Iti nokoowit mongungusaha’ nokoiyonon mongumpilin do pongindopuan diolo’ noumpadanan.
“Moomoguno nopo nga’ manu gatang omurah. Nga’ id ogumu’ kes, gatang mantad mongungusaha’ kumaa moomoguno pinoingkawas do tulun tanga’,” ka disio.
Jamawi nga’ pinoposotol nogi’ do koporintaan pogun tumopot papagaras Sabah Agricultural Marketing Authority (SAMA), kotinanan kapadagangan wagu i pinoiliu id siriba’ komontirian disio do mogiigintong piromutan kapadagangan asil pomutanaman, pomutayaman om ponginsadaan.
“Monongkounsikou tokou kumaa di Boyoon Montiri tu’ SAMA tinampasi kaagu sabaagi songinan kotinanan kapadagangan. Id timpu limo toun diti, pogorison tokou SAMA montok monoibau kohompiton tulun tanga’ id pidagangan,” ka disio pinopointalang.
Jamawi (kotolu, gibang) guminambar pongingitanan miampai di Leonard (kotolu, wanan), Dr. Mary (koduo, gibang) om sitar Koupisan Veterinar.
Minoboros isio, pidagangan manuk id Sabah noondo diti nokoposurat rontob kosukupan tinan (SSL) id kikiro 95 pihatus, nga’ wookon dilo’ kakal tumalahan kumaa nudar i sasaru’ oundoronok do kobolingkahangan ponoludupan.
“Nung opitamangan tokou do poinponu’ kopokionuan om kopouyuhan, kaanu tokou mongingkuri’ nudar. Nga’ pipiro produk miagal palapa’ manuk kakal nuru’ udaron tu’ kopokionuan di akawas kopio – songinan manuk haro no duo palapa’,” ka disio miingasou.
Ka disio, koporintaan manu papatantu’ gatang manuk nokoiyonon koguli’ koponokitopong montok mongingkuri’ ponoludupan om mongumolig mongungusaha’ nokoiyonon.
“Nung kopouyu tokou gatang manuk nokoiyonon di lobi osonong, amu’ no nuru’ manuk udaron sumuang miampai amu’ opinidsarahan. Iti nga’ kopongingkuri’ nogi kaantakan babarang amu’ halal toi amu’ oumolig montok owiton sumuang,” ka disio pinoposotol.
Minoboros i Jamawi, laang ngaawi’ di maan pogurao’ kaampai mongulud data pidagangan, mongulud pangaba’ om mongingkawas ginumu’ kopolobusan nokoiyonon.
“I oponsol, manu tokou papatantu’ rayat kaanu gatang poinpatut, mongungusaha’ kaanu tumilombus kiginoris tumopong, om tonggungan tulun tanga’ aanu mongingkuri’,” ka disio.
Minoboros kawagu isio do komontirian momonsoi pipiro kapahabaran potilombus katalib sesi kopohompitan dilo’ do amu’ no alaid.
Nokotindapou nogi’ i Potunud Koupisan Surupukaraja’ Veterinar, Dr. Mary Josephine Golongai i minanahak nogi kopointalangan karait do koupisan dilo’.
