Jamawi (tanga’) minintong koiyonon baang id Kampung Bunut ontok pinapaharo kotombuluyan do hilo’.
TENOM: Projik panapad liyud id Tenom maan tilombuso’ sundung pia do haro pipiro kampung i nakalabus mantad rulud kopio ponuridongan, ka di Montiri Pomutanaman, Ponginsadaan om Pomorunan Akanon, Datuk Jamawi Jaafar.
Minoboros isio, haal dilo’ pinoilaan kumaa mogigiyon id sesi pibabarasan (dialog) i naampai nogi’ do Koupisan Pomuwoigan om Poluyungan (JPS) Sabah montok monimbar kotongoban diolo’ karait kopoindalanan projik nokomoi.
“Mogigiyon minuhot nung projik diti tingkadan toi amu’, nga’ iti nopo projik koporintaan om nuru’ tilombuson. Monongkounsikou tokou kumaa Potunud JPS Sabah, Ir. Haji Siraja Haji Bashora nogi’ Datuk SUT MAFFI, Datuk Leonard Stephen Poyong i luminintuhun popointalang laang ngaawi’ potilombus dilo’ kumaa mogigiyon,” ka disio.
Ka di Jamawi, mogigiyon nga’ mokimoilo nogi’ do laang posusuhut katalib koindalan fasa kumoiso’ projik, kaampai koyuon kampung i okon ko’ id ruludan panapad di masaan turidongon.
“Pinoilo oku do JPS poposodia’ atag fasa duo montok potoguangon kumaa koporintaan Pisompuruan. Iti mooi do koiyonon i nakalabus nga’ karamit nogi’ do ponguhupan montok mongingkuri’ waya’ liyud nung koingkawas do rontob waig,” ka disio pinopointalang.
Ka disio, atag dilo’ kopohompit pamaraladan baang nogi’ koponguotan tisan id koiyonon di pogulud iti baang napatai nga’ noondo nokoponuridong rulud wagu nung piadangon di limo toun nakatalib.
“Nung fasa duo aanu popoindalan, otumbayaan oku kobolingkahangan id koiyonon diti oingkurian om mogigiyon lobi osontob. Pogulu diti kopuriman yolo’ noimamang do koyuon, nga’ soira’ nokointalang do JPS, karati yolo’ do projik diti nuru’ tilombuson,” ka disio po nogi’ ADUN Melalap.
Jamawi (toguang) minintong palan koruludon Palan Panapad Liyud (RTB) Baang Padas Sabah miampai di Ir. Haji Siraja (tanga’).
Minoboros isio, tolu kampung di kohompit, wookon dilo’ Kampung Ului om Kampung Makakagas om Kampung Binaie hinombo do mogigiyond ilo’ pinopolombus kotongoban nung aantakan liyud agayo do timpu dumontol nosusuhut haro sapad id pialatan kampung diolo’ om koiyonon suai.
“Pinonorisidan JPS nokopokito rontob waig kaanu minsawat 8 gisom 12 inci nung aiso’ karaja’ kopongukadan montok momoruhang ginumu’ potimungan waig. Mantad dilo’ fasa duo oponsol kopio,” ka disio pinoposotol.
Daamot dilo’, i Jamawi minongomi nogi’ karait kopointutunan ababayan ‘Kebun Dapur’ sabaagi inggisaman mongingkawas nindopuan nogi’ rontob kosusukupan mogigiyon kampung.
“Pointonod tadau kumoiso’ ku ruminuput id komontirian, pinaatag ku ababayan kebun dapur om rinamit osonong dilo’ di koinsanai momuruan koupisan. Mogigiyon kaanu mananom kinotuan id tisan walai, momogompi’ manuk toi kambing sabaagi inggisaman momoruhang nindopuan,” ka disio.
Ababayan dilo’, ka disio, pouyuhon maya’ pakej pinotomod mimpuun wulan Koduo soira’ po do opongo koposodiaan kogogonopan om ‘model’ kabun.
“Monuridong tokou nogi longkod ponimungan asil mooi do i noolu’ mantad kabun dapur aanu padagangon. Miamapi kouhupan tongo koupisan MAFFI, lobi kogumu’ mogigiyon kampung kaanu koundaran,” ka disio.
Jamawi pinopoilang nogi raramit osonong mogigiyon i nounsub sunduan popoindalan kaparagatan kabun diolo’ sompoopori.
“Haro i miinggasou doho’: ‘Bos, mimpuun tadau diti amu’ oku nodi mamain golf tu’ nokoboli oku no do sangkul om sikup.’ Iti kopokito ababayan diti minanahak waya’ kumaa koposion mogigiyon,” ka disio.
Pinosotol disio do ababayan dilo’ tilombus papagaras, kaampai inggisaman popotongkop pomusarahan wagu mooi lobi kogumu’ rayat kopuriman tonggungan om karaja’ koupisan id siriba’ komontirian disio.
