Hajiji tuminabi’ miampai mogigiyon Matunggong id Pitimungan Mega Jelajah Kempen Pomilian Agayo DUN Matunggong doid Lintuhun Poingukab Matunggong id Matunggong, Kudat di tadau baino’.
KUDAT: Rayat pinosorou do amu’ momili’ parti i amu’ nakalantoi (nopiil) montok momorinta’ id pogun diti, ka di Boyoon Montiri om Ponorikohon Gabungan Rakyat Sabah (GRS), Datuk Seri Haji Hajiji Haji Noor.
Minoboros isio, sabalik dilo’ pilion no koporintaan GRS i nokopokito no do naangayan osonong om kogoosan dau momorinta’ Sabah solinaid limo toun diti.
Hajiji miampai calon GRS DUN Matunggong, Datuk Julita Majungki om tongo’ lansanon nogi’ mononokodung id Pitimungan Mega Jelajah Kempen Pomilian Agayo DUN Matunggong doid Lintuhun Poingukab Matunggong id Matunggong, Kudat di tadau baino’.
“Koporintaan GRS nokopoindalan mogisusuai inggisaman om ababayan nogi’ minongingkawas koburuon ikonomi kaampai nopuhu asil om rizab pogun diti.
“Iti nopo nga’ iso’ kinalantaion i apatut ondoson do rayat. Mogowit tokou do Sabah kumaa iso’ rontob po katalib pomilian agayo diti mooi kotopong di pogun suai id pomogunon diti.
“Okon ko’ moboros tokou aiso’ suang miagal pembangkang i orohian momonsoi totondos om ogumu’ po pagkakaa nga’ otopot nopo aiso’ suang,” ka disio id ababayan Kimpin ‘Rumah Kita, Kita Jaga’ GRS DUN Banggi om Tanjong Kapor id Dataran Tomborungus Kudat, do hiti, di tadau baino’.
Hajiji tuminabi’ do mogigiyon Matunggong id Pitimungan Mega Jelajah Kempen Pomilian Agayo DUN Matunggong doid Lintuhun Poingukab Matunggong id Matunggong, Kudat di tadau baino’.
Nokotindapou nogi’ calon GRS DUN Banggi, Datuk Mohammad Mohamarin om calon GRS DUN Tanjong Kapor, Datuk Chong Chen Bin.
Kohondot dilo’, Hajiji po nogi’ calon GRS montok Lintuhun Undangan Pogun (DUN) Sulaman minokianu rayat id watas DUN Banggi om DUN Tanjong Kapor do momili calon GRS montok watas dilo’ sabaagi mobi’ rayat diolo’ id pomilian agayo diti.
“Oimbayat oku di goduduo lansanon diti tu’ yolo’ haro ‘visi’ poinpopori montok popoburu’ koiyonon sompoopori kosuul no id sunduk balajaran om koburuon infrastruktur.
“Kaanu yolo’ mamalan montok koundaran rayat om lansanon miagal diti no i pokionuon tokou do mongobi’ konosipan rayat, i haro visi om sondikoton. Kada’ tokou kinongoho’ calon ngaawi’ i komilo no do mimboros aiso’ suang nga’ pilio’ no calon koporintaan tu’ iti no i mogowit koundaran kumaa rayat,” ka disio.
Hajiji miampai calon GRS DUN Tanjong Kapor, Datuk Chong Chen Bin om calon DUN Banggi, Datuk Mohammad Mohamarin nogi’ lansanon om mononokodung id ababayan Kempen Rumah Kita, Kita Jaga GRS DUN Banggi om Tanjong Kapor doid Dataran Tomborungus Kudat, Kudat, di tadau baino’.
Kohondot dilo’, kalansanan di Hajiji koporintaan GRS onuan mandat id pomilian agayo diti baino’ mooi do koponilombus kaparagatan Sondikoton Sabah Maju Jaya (SMJ) 2.0.
“Id timpu limo toun diti, nokopoburu’ tokou ikonomi, nokoowit tokou nogi do sumuang mangangapu’ om minonuridong taman pomorunan wagu id Kudat i nointutunan sabaagi Taman Pomorunan Ikonomi Obulou (Ekonomi Biru).
“Iti no koporintaan i mogowit mogisusuai koundaran kumaa rayat. Pogulu diti amu’ tokou insan korongou pamalanan miagal diti nga’ koporintaan GRS no i minomusorou dilo’.
“Kohondot dilo’, nung oinsanan palan diti kaampai taman pomorunan diti aanu popoindalan id Kudat, tantu no do rayat watas diti i oundaran. Tantu no diti kapanahak kosiwatan pakarajaan kumaa mogigiyon id watas diti,” ka disio.
Hajiji miampai mogigiyon DUN Tanjong Kapor om DUN Banggi id ababayan Kempen Rumah Kita, Kita Jaga GRS DUN Banggi om Tanjong Kapor doid Dataran Tomborungus Kudat, Kudat, di tadau baino’.
Mantad dilo’ insan po isio pinoposorou rayat do amu’ obingampawong di lansanon toi parti i monondos koporintaan GRS nopiil.
“Otopot nopo nga’ yolo’ i nopiil, tu’ haro i nokoumbal nosili boyoon montiri om montiri labus kakadayan id Pisompuruan om nogi’ montiri JKR id pogun diti. Nga’ kobolingkahangan pangaba’ waig, lotirik om talun-alun labus kakadayan id pogun diti pia nga’ amu’ nasalasai.
“Tondoson diolo’ koporintaan pogun nopiil nga’ i nopiil do otopot nopo nga’ yolo’. Mantad dilo’, onuan kosiwatan insan po kumaa koporintaan GRS montok limo po toun. Lobi kogumu’ koburuon owiton nung rayat tumilombus manahak mandat om pokionuon ku rayat Kudat do tumilombus manahak sokodung kumaa calon GRS montok DUN Banggi om Tanjong Kapor do ko 29tw Kohopod om Iso’ diti,” ka disio.
Naamot dilo’ id Pitimungan Mega Jelajah Kempen Pomilian Agayo Lintuhun Undangan Pogun (DUN) Matunggong id Lintuhun Poingukab Matunggong doid Matunggong, ka di Hajiji, pomilian agayo diti baino’ oponsol montok manantu koporintaan i momorinta’ Sabah solinaid limo po toun.
“GRS monoguang pomilian agayo diti miampai poinponu’ kotumbayaan om kotumbayaan diti mimpau di kinalantaion tokou id kinopoburuan ikonomi om kasasanangan rayat id timpu limo toun diti. Kalansanan ku mongungundi’ Matunggong kada’ sala’ pili’ nga’ pilio’ no calon GRS ilo’ nopo nga’ i Datuk Julita Mojungki.
“Id Matunggong ogumu’ calon monokiala’ nga’ rikod mobi’ rayat Datuk Julita solinaid nosili mobi’ rayat om monguhup montiri nokopoindalan karaja’ miampai osonong om nokoowit kinomogoton id Matunggong,” ka disio.
Hajiji nga’ tuminindapou nogi’ id ababayan Kimpin Rumah Kita, Kita Jaga GRS DUN Bandau, PDM Bongon, Pekan Lama, id Kota Marudu.
