Hajiji pinapatahak replika kunci Rumah Mesra SMJ kumaa mamaramit id ramai kinapatahakan doid Menumbok di konihab.
MENUMBOK: Nuludan ngaran calun Gabungan Rakyat Sabah (GRS) montok Pomilian Agayo Pogun (PRN) Sabah ko-17 maan pahabaro’ do ko 12tw Kohopod om Iso, ilo’ nopo nga’ tolu tadau pogulu tadau kopomungaranan calun.
Boyoon Montiri, Datuk Seri Haji Hajiji Haji Noor pinopoimagon haal dilo’ ontok pinokianu mongomi karait pipiro parti pulitik suai i kipalan do papahabar calun diolo’ lobi kosopung, mimpuun koompokon minggu diti.
Minoboros isio, nombo-nombo parti posimbayan montok momonsoi kapahabaran sompoopori, nga’ GRS pinapatantu’ 12tw Kohopod om Iso (tadau Koduo) sabaagi tadau poimagon montok popointutun nuludan calun dau montok pomilian agayo i pinatantu’ do ko 29tw Kohopod om Iso.
“Nokopoikid tokou no do timpohon. Nung parti suai orohian papahabar lobi kosopung, kouli’ kumaa diolo’. Yati’ papahabar kotohuri, ontok 12tw Kohopod om Iso,” ka disio.
Minoboros isio dilo’ katalib pinopoimagon Kinopoimpuunan Palan Koburuon Strategik Watas Okoro’ Kuala Penyu om Menumbok 2025-2035, ramai kinapatahakan kunci Walai SMJ, kinapatahakan ‘warta tanah’, nogi’ kinopotunuian ponguhupan Yayasan Limus Jury i pinaharo id koiyonon tomu Menumbok, konihab.
Hajiji po nogi’ Ponorikohon GRS, pinopointalang kotumbayaan kumaa kogoosan piomungan dilo’ montok insan po do kaanu mandat rayat montok momorinta’ pogun katalib pomilian agayo dilo’.
Minoboros isio, kotumbayaan dilo’ mantad no do kootusan GRS popotigulai nuludan calon di agaras om ‘boleh menang’ id koinsanai timpohon di tondingon.
“Popotigulai tokou nodi calun i boleh menang, kaampai id Kuala Penyu. Nakapatahak oku do ponginsomokan pogulu diti, om otumbayaan tokou kosigampot kalantaion id poimlian agayo diti baino’,” ka disio.
Ka disio, nung GRS kotilombus onuan mandat, koporintaan buruanon disio monilombus kopoindalanan Palan Koburuon Sabah Maju Jaya (SMJ) 2.0 montok papatantu’ kotilombuson koburuon id Sabah.
Id haal suai, Boyoon Montiri kaakun mooi do atag pamansaian jambatan popiromut Watas Pisompuruan Labuan miampai tana’ agayo Sabah pibabarasan kawagu miampai koporintaan Pisompuruan.
Ka disio, kogogonopan dilo’ oponsol okon nopo ko’ montok papasanang piromutan id pialatan pulou dilo’ om tana’ agayo Sabah, nga’ kaanu posindak po do ikonomi watas okoro’ Menumbok om Kuala Penyu.
