Haji Hajiji Haji Noor
KOTA KINABALU: Sabah pinopoimagon koonuan 25 pihatus nigitan kosongonuan (ekuiti) id PETRONAS PFLNG 3 Sdn. Bhd. – iso’ laang kohunung i koponginggirot po do ‘sinergi’ (piuhupan) id pialatan komponi petroleum nasional om pogun diti, ka di Boyoon Montiri, Datuk Seri Haji Hajiji Haji Noor.
“Laang diti okon nopo koponginggirot piuhupan pialatan PETRONAS om Sabah, nga nogi’ mongukab kosiwatan montok piuhupan miagal dilo’ do timpu obontol,” ka disio.
Maya’ SMJ Energy Sdn. Bhd. (SMJ Energy), Sabah suminain pinibatosan pohimagon miampai PETRONAS LNG Sdn. Bhd., tanak komponi PETRONAS, montok pinopoimagon koponowolianan 25 pihatus koponsolon nigitan id PETRONAS PFLNG 3, i ointutunan nogi’ do ZLNG, do hiti di tadau baino’.
Laang nopo diti nga’ nosusuhut di pinikagosan Tulu Pibatosan (Kepala Perjanjian) montok atag koponowolianan dilo’ i sinasi’ di Hajiji om Presiden po nogi’ Luguan Upisor Eksekutif Tinimungan PETRONAS, Tan Sri Tengku Muhammad Taufik, id Kuala Lumpur di ko 17tw Koturu’ katatalib.
PETRONAS PFLNG 3 masaan popoburu’ kogogonopan gas sandad ‘cecair terapung’ doros tisan rahat (FLNG) kigatang USD3.1 bilion doid Taman Pomorunan Tumau om Gas Sipitang (SOGIP).
Pikikiro monimpuun kotorinaan do pintangaan koduo toun 2027, PFLNG 3 winonsoi miampai kapasiti kopolobusan soginumu’ duo riong tan sontoun (2.0 MTPA).
Kopoopuan kohunung nopo diti nga’ pomoruhang kaawagu kumaa ‘portfolio’ kopoopuan mogisusuai SMJ Energy. Komponi dilo’ do babaino’ mongigit 50 pihatus koponsolon kotonudan id Samarang Production Sharing Contract, 10 pihatus koponsolon ekuiti id PETRONAS LNG 9 Sdn. Bhd., 25 pihatus koponsolon ekuiti id PETRONAS Chemicals Fertiliser Sabah Sdn. Bhd. (loji petrokimia SAMUR), nogi’ kosongonuan poinpnou’ Sabah International Petroleum Sdn. Bhd. (SIP) i popoindalan aset FPSO om FSO.
Suai dilo’, SMJ Energy nga’ mongigit kopotutan ‘free carry’ om ‘back-in rights’ id blok pongukaban SB409 (20%), SB403 (20%), SB306A (15%) om SB306B (15%).
