Hajiji (wanan) minintong kosolimbahan mitilombus miampai di Masidi.
KOTA KINABALU: Boyoon Montiri (KM), Datuk Seri Haji Hajiji Haji Noor minongomi Bajet 2026 sabaagi bajet komogoton om kopogkikitan i amu’ momolihu koponsolon mogisusuai nayatan mogigiyon, kosuul no yolo’ i amu’ songkuro kikosukupan.
“Orohian oku mamason bayahan kumaa Luguan Montiri mantad kinapawaladan Bajet Pogun di ‘progresif’ diti.
“Bajet i moningkanan kumaa koburuon ikonomi pomogunon diti i pinopoobi’ po nogi’ RM6.9 bilion montok Sabah, i kotumbayaan kapanahak koundaran agayo kumaa pogun diti,” ka disio soira rinubaan katalib minintong kosolimbahan mitilombus kinapawaladan Bajet 2026 di Luguan Montiri po nogi’ Montiri Kousinan, Datuk Seri Anwar Ibrahim, di tadau baino’.
I Anwar pinapahabar po nogi’ do kopoobian RM6.9 bilion kumaa Sabah montok toun tiso’ nopo nga’ i bobos akawas noumbalan pinatahak do koporintaan Pisompuruan.
“Bajet diti okon ko’ numbur nopo, nga’ asil mantad kaadangon pulitik Sabah id siriba’ pomorintaan Gabungan Rakyat Sabah (GRS) nogi’ koutmbayaan koporintaan Pisompuruan kumaa kopomuruanan pogun. Sabah noondo diti ototopot pinotonggoi poinggayo id koburuon pomogunon,” ka di Hajiji.
Id bajet dilo’, i Anwar pinapaatag nogi’ kopoobian kiginumu’ RM765 riong montok ponuridongan piromutan lotirik Southern Link, i ka di Hajiji kapanahak koundaran kumaa oinsanan rayat Sabah.
Pinoobi’ nogi’ RM220 riong montok karaja’ ngaawi’ ponginsonong kogogonopan di naraag gama-gama’ kadaaton sandad di kaawagu diti i nokoumpadan do Sabah, kaampai IPG Gaya, nogi RM39 riong montok Fasa 2 projik panapad liyud.
Hajiji minonongkounsikou nogi’ kumaa koporintaan Pisompuruan mantad sokodung po’ompus kumaa projik Ralan Agayo Pan Borneo Sabah, miampai kopoobian kiginumu’ RNM1.67 bilion do toun tiso’.
Minamarayou isio tonggungan koporintaan Pisompruuan montok monumboyo’ Pibatosan Malaysia 1963 (MA63) nogi’ monumboyo’ kopokionuan Sabah, kaampai popoingkawas Geran Pinotomod Interim mantad RM300 riong kuminaa RM600 riong.
Nokotindapou nogi’, Montiri Kousinan Pogun, Datuk Seri Masidi Manjun; Monunurat Koporintaan Pogun, Datuk Seri Safar Untong, monguhup montiri om upisor totuo koporintaan pogun.
