Hajiji miampai naalap suai pinopowonsoi gimik sumungkad Projik Pomuwalaian om Lot Komersil Kotinanan Koburuon Pomuwalaian om Kakadayan (LPPB) Kampung Taka, Pitas id luan Lintuhun Mogigiyon Watas Pitas di koinihab.
PITAS: Gabungan Rakyat Sabah (GRS) kipogoyuon poingukab kumaa nombo-nombo parti komponen i momili’ do tumanding miampai poinpoopori id Pomilian Agayo Pogun Ko-17 (PRN17) obontol.
Boyoon Montiri, Datuk Seri Haji Hajiji Haji Noor minoboros, GRS amu’ insan pononsog nombo-nombo parati komponen do monongkiad piomungan dilo, nga’ kootusan montok tumanding mimpoopori nopo nga’ kopotutan sorompoopori.
“Nung orohian yolo’ tumanding do poinpoopori, ilo’ kootusan diolo’. GRS amu’ mogodu,” ka disio.
Poingkuro po, i Hajiji po nogi’ Ponorikohon GRS pinoposotol do pointatap disio otumbayaan di ginaras om pisompuruan piomungan dilo’ mimpau di piuhupan ogirot id pialatan tongo’ parti ngaawi’ komponen dau nogi’ sokodung ouli’ rayat Sabah.
“Insya’-Allah, kalantoi tokou id pomilian agayo obontol. Miampai tokou koombolutan komponen suai, lolobi no Parti Bersatu Sabah (PBS), kakal ogirot. GRS kotilombus sabaagi piomungan di agaras om ogirot id Sabah.
“Monilombus tokou kopoburuan diti tu’ pamanahan tokou id tanda’ ralan nogi’,” ka disio ontok pinopoimagon Ababayan Sumungkad Projik Pomuwalaian om Kadai Kotinanan Koburuon Pomuwalaian om Kakadayan Sabah (LPPB) Kampung Taka id luan Lintuhun Mogigiyon Watas Pitas, do hiti, konihab.
Daamot dilo’, minoboros i Hajiji, kopoindalanan ababayan koburuon id siriba’ sondikoton Sabah Maju Jaya (SMJ) pointonod somok limo toun nakatalib nosili kointalangan ginoris koporintaan pogun minononduli’ ikonomi nogi’ minonginggirot kasasanangan rayat.
Pinosotol disio do mandat pinatahak rayat pointonod wulan Kosiam 2020 amu’ pinararama, nga’ pinadalin maya’ kinopoindalanan SMJ i noondod iti nokopokito asil.
“Sundung pia potoguang mogisusuai kaantaban om pomohingi, kopomuruanan koporintaan pointatap ogirot popoindalan tonggungan rayat. SMJ okon ko’ slogan nopo, nga’ iso’ palan kohunung i nokopokito no do asil,” ka disio.
