Hajiji nonuan kopointalangan karait sistem waig inumon tahason nano id Kampung Baru-Baru, Tuaran.
TUARAN: Boyoon Montiri, Datuk Seri Haji Hajiji Haji Noor minongunsub do Jetama Sdn. Bhd. popoinggayo kapadakatan sistem waig inumon tahason nano kiginoris solar kumaa lobi kogumu’ koiyonon poonsokid.
“Sistom i tinuridong do Jetama diti osonong kopio tu’ kaanu mangaba’ waig noubatan mantad torobong tiub kumaa koiyonon i amu’ kaanu piromutan kumaa pangaba’ waig oborisi’,” ka disio katalib minooi intong kogogonopan wagu i pinodokot id Kampung Baru-Baru, do hiti, di tadau baino’.
Minoboros isio, mogigiyon Kampung Baru-Baru amu’ insan kopuriman waig noubatan pogulu diti tu’ kinoiyonon do kampung dilo’ adalaan kosodu’ mantad piromutan paip agayo. “Monongkounsikou oku kumaa Jetama tu’ minamasang kogogonopan diti do hiti,” ka disio kawagu.
Ka di Hajiji, sistem dilo’ i momoguno ginoris solar toi ‘bank bateri’ montok popoindalan kopomurisian waig kosudong kopio montok koiyonon labus kakadayan, poonsokid om tongo’ tongo’ pulou id Sabah.
“Pokionuon ku Jetama monimbang kapadakatan sistem diti id lobi kogumu’ kampung poonsokid,” ka disio.
Miampai kos kikiro RM1.2 riong, sistem waig inumon opiwaliu-waliu i mindalan sondiri’ dilo’ kaanu mongimbulai gisom 30,000 waig noubatanan sangadau. Ilo’ noinggonopan nogi’ do sensor om mananamong montok miontong binurisi waig nogi’ naangayan sistem, potilombus dino popisudong di kopoindalanan dilo’ tumanud kogunoon.
Waig noubatan di nowonsoi poopion id tangki pogulu poikidon kumaa mogigiyon maya’ paip toi sistem kopoikidan suai.
Nokotindapou nogi’ i Kumoduo Boyoon Montiri II po nogi’ Montiri Karaja Agayo, Datuk Ir. Shahelmey Yahya om Ponorikohon Jetama, Datuk Yusuff Manan.
