Hajiji nonuan kopointalangan karait projik Talun-alun Agayo Pan Borneo Serusop – Pinturu ontok kinotombuluyan karaja’ disio id Kampung Penimbawan, Tuaran.
TUARAN: Boyoon Montiri, Datuk Seri Haji Hajiji Haji Noor monongkosontob ginawo di kinoburuon projik talun-alun agayo Serusop – Pinturu kininaru 20.8 kilometer id siriba’ Talun-alun Agayo Pan Borneo, do hiti.
“Nakakakap oku koioyonon projik di tadau baino’ om osontob ginawo di kinoburuon i noondo diti nokoponogulu timpu pinatantu’,” ka disio katalib minooi intong iso’ wawaya’an ralan id Kampung Penimbawan, do hiti, di tadau baino’.
Pamansaian talun-alun kigatang RM465 riong dilo’ nokotimpuun di ko 20tw Koiso’ 2025 om pikikiro opongo ko 19tw Koturu’ 2028.
Projik diti kopohompit pamansaian talun-alun iso’ koongoyo’ (sigle-carriageway) i koporomut Tuaran om Kota Belud, kaampai songinan jambatan kininaru 682 meter.
Id kinotombuluyan dilo’, i Boyoon Montiri nonuan kopointalangan di Potunud Koupisan Karaja Agayo Pogun, Datuk Philemon Lajawai om upisor dau.
Nokotindapou nogi’ i Kumoduo Boyoon Montiri III po nogi’ Montiri Karaja Agayo, Datuk Ir. Shahelmey Yahya.
