Dr. Joachim (koduo, wanan) minomutul ribon ponokotanda’ kinopoimaganan lintuhun mini Kampung Kantas.
RANAU: Kumoduo Boyoon Montiri II, Datuk Seri Dr. Joachim Gunsalam pinoposotol do koburuon id Sabah, kaampai Kundasang, poindalnaon mimpau Sondikoton Palan Koburuon Sabah Maju Jaya (SMJ) i nosili puralan oponsol koporintaan Gabungan Rakyat Sabah (GRS).
Minoboros isio, Sondikoton SMJ okon nopo ko’ papatantu’ koburuon kogogonopan om ikonomi koindalan oturundus, nga nogi’ poposuul koburuon ‘modal insan’, kaampai balajaran tangaanak sabaagi kopoopuan timpu dumontol pogun.
“Koporintaan GRS poingigit do Sondikoton SMJ i kapatantu’ oinsanan sunduk koburuon kotilombus komogot, i potuu mantad sunduk kogogonopan, kasasanangan rayat toi ko’ kopoingkawasan sinonong balajaran sukod wagu,” ka disio ontok minoboros id ababayan miampai mogigiyon PDM Nawanon id Lintuhun Mini Kampung Nawanon, do hiti, konihab.
Dr. Joachim po nogi’ Puru Lintuhun Undangan Pogun (ADUN) Kundasang, pinosotol do kalantaion koburuon okon ko’ aantakan songkirop nopo.
Dr. Joachim suminain id plak lintuhun mini wagu Kampung Kantas sinasi’ dilo oinsanan nokotindapou id ramai dilo’.
“Maan poidaran, katalib pipiro linaid, om haro nogi’ kapamansaian ralan mantad Simpang Tarawas kumaa SK Kaingaran nogi’ Singgaron-Mansalu (SK Kawiyan). Iti kointalangan kopotilombusan inggisaman lansanon nokopogulu i pinotilombus do koporintaan noondo,” ka disio pinopointalang.
Isio i po nogi’ Montiri Koporintaan Koiyonon om Pomuwalaian minoboros, GRS kuminaraja’ agaras id timpu limo toun nakatalib miampai mogisusuai naangayan om tumilombus minggisom montok monginggirot koburuon id penggal pomorintaan do potilombus diti.
“Kopomilian koporintaan om mobi’ rayat nopo nga’ kopotutan dokoyu. Posimbayan kou do momili’ isai mobi’ rayat. Nga’ otumbayaan oku do GRS pointatap kosili koporintaan kawagu tu’ nokopokito tokou karaja’ di atalang, okon ko’ ‘retorik’ (pagkakaa),” ka disio.
Id ramai miagal, Molohingon Kampung Nawanon, Daini Ambag pinopolombus kopongunsikohan kuminaa di Dr. Joachim tu’ pinapatahak mogisusuai kogogonopan montok kasasanangan mogigiyon. Nangatan nogi’ disio mogigiyon do tumilombus monokodung koporintaan di poinharo mantad miampai ogirot.
Daamot dilo’, id ababayan sopisuai, Dr. Joachim pinopoimagon nogi’ Lintuhun Mini Kampung Kantas om ruminuba’ mogigiyon do hilo’.
Minoboros isio, kogogonopan wagu dilo’ kapanahak koiyonon osimbayan kumaa mogigiyon popoindalan kaparagatan sosial om ‘rekreasi’ miampai amu’ osidangan toi arasaman.
Ponorikohon Puruankuasa’ Komogoton om Koumoligan Kampung (JKKK) Kantas, Hernita Tanggangon, pinopolombus koponongkounsikohan kuminaa di Dr. Joachim om lumansan mooi do koporintaan kopongukab lobi kogumu’ ralan kabun montok papasanang kapadagangan asil tanom mogigiyon.
Minongomi kopokionuan dilo’, sinuhu’ di Dr. Joachim om JKKK poposurat tongo’ ralan kabun montok patahakon kumaa Unit Momuruan Koburuon Mogigiyon (UPPM) Kundasang, mooi do laang posusuhut aanu popowonsoi.
Nokotindapou nogi’ id ramai dilo’ i Monunurat Pulitik kumaa di Dr. Joachim, Yubidi Gumpoyo; Lansanon Koburuon Mogigiyon DUN Kundasang, Dounis Sani; Popomogot Mukim, Saiful Ruling; nogi’ pipiro sitaf UPPM.
Kapt:
