Karaja’ kopomilanaan burutak noowit liyud id suang KD Gadong Papar.
PAPAR: Komontirian Kolidasan Malaysia (KKM) pinopolulus kopoobian RM1 riong montok ponuridangan Kolinik Kolidasan Simpudu (Type 3) i katampung ginumu’ korikotan susumakit id Kolinik Desa (KD) Simpuru om KD Biau.
Montiri dilo’, Datuk Seri Dr. Dzulkefly Ahmad minoboros montok manahak kosiwatan ponuridongan kolinik wagu id koiyonon do pasampaping dilo’, KD Simpudu somponon naamot id timpu onom gisom siam wulan om tongo’ susumakit kaanu mokiusap id KD Biau.
“KD Simpuru diti okon ko’ nohompitan do liyud toi noumpadanan gama-gama’ liyud nga’ otopot nopo nokotoguang kinososoton tana’. Kinososotan tana’ i alaid no diti gama-gama’ kinotuhanon tisan baang.
“KD diti osomok do tisan baang om id koyuon di amu’ oumolig, nga’ oponsol montok sikapan tokou manahak iso’ palan do posogulu.
“Nokopiboros oku miampai di Potunud, Dr. William om koombolutan suai montok mongintutun, sundung do amu’ noilaan mantad koyuon tana’, nga’ haro no palan tokou id toguang montok monuridong piomungan KD Simpudu om KD Biau.
“Mongilo okon ko’ KD nga’ iso’ KK (Kolinik Kolidasan) i turidongon tokou iso’ KK (Type 3) kohunung miampai poposili dilo’ ‘future focus, future ready’. Naamot KD Simpudu dilo’ i oundarangan, powolihon tokou kumaa KD Biau,” ka disio pinopointalang.
Dzulkefly ontok rinubaan media.
Id haal di poinhompit, Dzulkefly nga’ pinopolulus nogi’ kopoobian osikap RM50,000 montok mongolon kakamot di naraag id KD Gadong i komoyon disio noumpadanan kopio mantad di siam kolinik i naantakan kadaat id Sabah.
“Mantad di 9 KK pososorili’, kolinik diti no i bobos noinraagan, noumpadanan om gisom noondo diti amu’ po naanu minongukab naamot KK di suai nokotimpuun no surupukaraja’.
“Mintong kumaa kinaraagon tongo’ kakamot, i potuu kakamot di asanang papawaliu om nogi’ ‘non-medical’ om nogi’ ‘equipment’ di nointob-intob tokou di tiinu’, poluluson ku kopoobian osikap RM50,000 montok mongolon kakamot di naraag,” ka disio.
Minongomi kotilombus ka di Dzulkefly, Potunud Koupisan Kolidasan Pogun Sabah sinuhu’ do mongintutun koiyonon wagu tana’ pisompuruan montok ponuridongan kolinik pongolon monotk KD Gadong Papar sabaagi laang timpu anaru tu’ koiyonon di haro mantad poinbanta’ kumaa kadaat liyud.
“Lobi koponsol mantad dilo’, timpu anaru, sinuhu’ ku potunud JKN do mongintutun iso’ koiyonon wagu id tana’ pisompuruan montok dati’ monuridong kolinik pongolon tu’ koiyonon diti poinbanta’ kopio kumaa liyud om osorou ku oponsol montok dati’ moningkanan maganu koiyonon di wagu,” ka disio kuminaa media katalib minooi intong kogogonopan kolidasan id KD Gadong doros hiti, di tadau Kolimo.
Dzulkefly id Sabah montok kotombuluyan karaja’ solinaid duo tadau pointonod di songkonihab do minooi ruba’ di nongogompitan kadaat liyud om tana’ nopiang id longkod ngaawi’ poundolihan.
