Caroline soira id konti UMSfm.
KOTA KINABALU: Tulun ginumuan alapon tumindapou Pokikitanan Tadau Malaysia 2025 id Koupisan Arkib Pogun Sabah i ukaban miampai aiso’ kabayar mimpuun do ko 9 gisom ko 13tw Kosiam diti.
Monguhup Kurator Koupisan Muzium Pogun Sabah, Caroline Mosigil minoboros, pokikitanan kopihondot pamaramaian Tadau Malaysia Nayatan Pogun Sabah dilo’ kituduan manahak kosiwatan kumaa mogigiyon kosuul no sukod wagu mongilo susuyan pinonuridongan Malaysia nogi’ mamagatang pinoburu’ lansanon nokopogulu.
“Pokikitanan diti kopokito ‘artifak’ kisusuyan kahandaman, dokumen ouli’, gambar laid nogi’ notiip oponsol i kopokito tonggungan Sabah id pinonuridongan Malaysia om oponsol ilo’ id kapatayadan toilaan montok mogigiyon.
“Suai dilo’, pokikitanan diti okon nopo ko’ monimbuat gatang susuyan kahandaman, nga’ kalansanan koposuni sunduan ‘patriotisme’ om monginggirot korotion mogigiyon karait rati otopot Tadau Malaysia.
“Tulun ginumuan kikosiwatan mintong sondiri’ artifak sinjata’ misangod i owiton pinotomod id pokikitanan diti baino’ om ukaban miampai aiso’ kabayar kumaa oinsanan do ko 10 gisom 13tw Kosiam diti, mimpuun jaam ko 8 kosuabon gisom ko 5 sodopon.
“Mogisusuai kaparagatan ‘santai’ posodiaon nogi’ wookon dilo’ ‘Merdeka Pop Quiz’, Sinusulap Rahmah miampai taakanon apatut, Pialaan Suminsing Sinding P. Ramlee, Pialaan ‘Mobile Legends’, Pialaan Momowotik Tanak-anak nogi’ ‘Scavenger Hunt’,” ka disio kuminaa media katalib pituubungan miampai Radio UMSfm id Univositi Malaysia Sabah di tadau Koiso’.
Pokikitanan nopo dilo’ nga’ piniuhupan Koupisan Arkib Pogun Sabah om Koupisan Muzium Pogun Sabah kopihondot pamaramaian Tadau Malaysia Nayatan Pogun Sabah.
Daamot dilo’, pinointalang di Caroline limunduk ababayan nopo nga’ kapamaramaian Tadau Malaysia 2025 Nayatan Pogun Sabah do ko 16tw Kosiam id Padang Merdeka, Kota Kinabalu mimpuun jaam ko 7 totuong i otindapou di momumuruan akawas pogun nogi’ poukabon kumaa koinsanai rayat.
“Wookon ponuang kaampai no popokili Jalur Gemilang, booboroson kopoimaganan di Boyoon Montiri Sabah, tayangan montaj om pokikitanan pinotomod ki’uhu ‘Malaysia MADANI: Rakyat Disantuni’,” ka disio.
Kalansanan nogi’ disio tulun ginumuan rumikot ogumu’ kumaa pokikitanan om kapamaramaian pinomotod dilo’ montok mamarati susuyan kahandaman, momuriman sunduan kopogiagalan nogi’ poposindak pisompuruan rayat id siriba’ iso’ bondira.
