Haji Hajiji Haji Noor
SANDAKAN: Boyoon Montiri Sabah, Datuk Seri Haji Hajiji Haji Noor komoyon sabaagi lansanon i toririmo poposuul koponompuruan rayat om koponsolon pogun ko’ mantad pulitik doun parti.
Luguan Komulakan Parti Gagasan Rakyat (Gagasan Rakyat) Sungai Sibuga, Henry Haji Hamdan minoboros, haal dilo’ okito pointonod Pomilian Agayo Pogun nakatalib soira’ di Hajiji nokoponuridong piuhupan miampai Barisan Nasional (BN) montok mongilag pogiuriasan rayat.
“Id pomilian agayo pogun di nakatalib minonuridong tokou piuhupan kaampai no miampai BN om laang dilo’ nakaanu minongilag piuriasan id nayatan rayat,” ka disio id kointalangan do hiti, di tadau baino’.
Henry Haji Hamdan
Henry minoboros dilo’ ontok minongomi kointalangan Puru Parlimen Libaran, Datuk Suhaimi Nasir i ka disio kaagal-agal do tukadan “kuman id soborong rahat okito, gajah id toguang mato amu’ okito”.
Pinosotol disio, i Hajiji toririmo aadang id pogiikidan karaja’ miagal montiri om monguhup montiri montok papatantu’ kaadangon pulitik nogi’ koponsolon rayat poinggompi’.
“Boyoon Montiri pinopowonsoi koinsanai diti mantad no do koponsolon diiso nopo nga’ rayat, okon ko’ koundaran sondiri toi tinimungan di atantu’ nopo,” ka disio pinoposotol.
Kohondot dilo’, pinosotol di Henry do i Hajiji apatut do umoligan om tilombuson sabaagi Boyoon Montiri tu’ mogisusuai inggisaman disio nakapanahak koundaran kumaa rayat, kaampai no id siktor balajaran om ababayan koburuon nayatan siriba’.
Id kointalangan disio, minambala’ nogi’ i Henry di Suhaimi i komoyon disio do amu’ apatut mononsog di Hajiji mongiliu karaja’ ,nanamot parti UMNO sondiri i potoguang kobolingkahangan kopomuruanan.
“Amu’ apatut songulun lansanon momoguno ‘undur’ (sumunsuri) montok monirung kinoponolikudan do tambalut piomungan Gabungan Rakyat Sabah (GRS) miampai minonobok mantad likud kopomuruanan maya’ ‘Langkah Kinabalu’,” ka disio.
Isio do insan po pinoposotol do ningkakaton om kopomuruanan di Hajiji nopo nga’ kohunung do noondo diti, om Komulakan Gagasan Sungai Sibuga tumilombus mingkakat ogirot monokodung disio.
