Dr. Joachim tuminabi’ om ruminuba’ mogigiyon kampung ontok suminuang balai rayat Kampung Tumbalang.
RANAU: Koporintaan Gabungan Rakyat Sabah (GRS) amu’ insan magada-gada’ rayat, kaampai id Lintuhun Undangan Pogun (DUN) Kundasang, ka di Kumoduo Boyoon Montiri II, Datuk Seri Dr. Joachim Gunsalam.
Isio po nogi’ Montiri Koporintaan Koiyonon om Pomuwalaian minoboros, oinsanan projik koburuon maan tilombuso’ kaampai ponuridongan songinan lintuhun ‘mini’ id Kampung Tumbalang katalib Pomilian Agayo Pogun (PRN).
Dr. Joachim minoboros dilo’ ontok ruminuba’ lobi 150 mogigiyon Kampung Tumbalang id Ababayan Lansanon Miampai Rayat id balai raya kampung, do hiti di konihab (8tw Kosiam).
Id ababayan dilo’, minanahak isio kopointalnagan karait Ababayan Ponukatan Tana’ Tanak Mamasok Pogun (PANTAS) i masaan poindalanon doid pototongkop watas.
Ka disio, tikid kopongupalaian PANTAS nuru’ mananud kosudongan atantu’ kaampai tana’ dilo’ nobuat toi noumbalan minorobuat.
“Oinsanan upalai nga’ mositi’ nogi’ kiharo puruankuasa’ ‘bertindak’ om kaanu sokodung Molohingon Kampung toi Ponorikohon JKKK,” ka di Dr. Joachim i po nogi’ ADUN Kundasang.
Naamot dilo’, Ponorikohon JKKK Kampung Tumbalang, Sapulin Bangsawan minonongkounsikou kuminaa di Dr. Joachim sabaagi mobi’ koporintaan pogun mantad kogogonopan di pinatahak, kaampai pinonuridongan jambatan gantung om kinapamasangan sumbu ralan.
Dr. Joachim pinapatahak toluod ‘bakul takanon’ kuminaa songulun mogigiyon kampung.
Id ababayan miagal, Dr. Joachim miampai Ponorikohon JKKK pinopoimagon ralan kokobunan om ralan kumaa tana’ pamalabangan kampung dilo’.
Nokopogulu, i Dr. Joachim pinapaharo mitingan kopointalangan (PANTAS) miampai mogigiyon Kampung Lobou Timbua om mitingan posodiaan dumontol PRN miampai do Induk, Komulakan om Koonduan (IPW) PBS DUN Kundasang id Upis ADUN Kundasang.
Minongupalai nogi’ isio mooi do jambatan gantung di haro mantad maan insanangai montok koumoligan om kogogonopan mogigiyon.
Nokotindapou nogi’ i Monunurat Pulitik di Dr. Joachim, Yubidi Gumpoyo; Luguan Watas, OKK Dominik Ghanie; Lansanon Koburuon Mogigiyon, Dounis Sani, nogi’ tongo’ molohingon kampung.
