KOTA KINABALU: Suruhanjaya Pongilagan Susuap Malaysia (SPRM) Sabah minanahan duo tulun, sopipoopori songulun pakakaraja’ koporintaan om songulun pinsin koporintaan tu’ kotumbayaan ‘pecah amanah’ (minanansala’ tonggungan) kikiro RM303,000.
Tumanud intodonon, goduduo notondosan i kapaampai mantad songulun kusai om songulun tondu’ kiumur 40 gisom 60an dilo’ tinahan kikiro jaam ko 12 pitanga’adau baino’ ontok tuminingan minanahak kointalangan id upis SPRM Sabah Raan Lahad Datu.
“Goduduo notondosan kotumbayaan miniupakat pinopowonsoi koulalaho’ dilo’ di kiikiro tulan Koturu’ 2020 gisom tulan Koduo 2021 ontok poingkaraja’ id songinan kotinanan koporintaan id pogun diti (Sabah).
“Ponoriukan osopung nga’ nokoilo do goduduo notondosan kotumbayaan minomoguno poinsala’ harata’ ilo’ nopo nga’ walu’ (8) set baucer bayaran kumaa pakakaraja’ songkosuayan kiginumu’ kikiro 303,000 nanamot pakakaraja’ songkosuayan dilo’ amu’ nakaramit do bayaran di komoyon,” ka disio.
Naamot, i Potunud SPRM Sabah, Datuk Mohd. Fuad Bee Basrah ontok rinomut pinopoimagon kinapahanan dilo’ om minoboros, kes soriukon id siriba’ Seksyen 409 Kanun Keseksaan.
