Redonah guminambar miampai tangaanak Tadika Korongkom, Kota Marudu.
KOTA MARUDU: Pamaramaian Tadau Kinopomorintaan Sondiri (Kinomordikaan) id Tadika Korongkom, Kota Maruru, di konihab nakapanau aramai miampai mogisusuai ababayan ‘patriotik’ kopohompit tangaanak, molohing om mogigiyon nokoiyonon.
Ramai dilo’ pinoimagon di Monunurat Pulitik kumaa Boyoon Montiri Sabah, Datuk Redonah Bahanda id Lintuhun PPR Taman Korongkom.
Id boboroson disio, Redonah pinoposotol do pamaramaian Tadau Kinomordikaan okon i ko’ ababayan popokili nopo bondira toi lumoyou sinding patriotik, nga’ nuru’ silihon timpu montok poposuni pogilisihan, pogipapantangan nogi’ kopodulianan kumaa tulun suai.
Pinosotol po nogi’ disio do kobolingkahangan ‘buli’ (mongumang-umang) i noondo nakaramit kopomodulianan mogigiyon, om pinoposotol do inggisaman monoibau kobolingkahangan dilo’ nopo nga’ tonggungan toinsanan.
“Ponudukan mimpuun mantad walai, tilombuson id sikul om inggiratan do mogigiyon. Tikid molohing kiguno sumili turianan tosonong, sikul nopo nga’ kitonggungan monuridong disiplin om kinoulunon, naamota mogigiyon nuru’ do toririmo opoduli’ kumaa koyuon pososorili.
“Soira’ do oinsanan bohogian mogiuhup, koponuridong tokou sinakagon di kiginayo ‘merdeka’, kipogoyuon osonong om koidu’ mantad buli,” ka disio.
Redonah minongoput, sunduan kinomordikaan nuru’ pokitanan id koposion tadau-adau kaampai monuridong mogigiyon di opoduli’, osompuru om kiginoris tumopong.
“Malaysia kalaang kumaa toguang sabaagi pogun di otoronong, osonong om kiginoris tumunda’ soira’ dati’ do popoindalan koyuon osonong diti id koposion tadau-adau,” ka disio kawagu.
Ababayan dilo’ rinamai miampai pokikitanan tangaanak prasikul, suai ko’ Pialaan Posokoton Koubasanan Paganakan i minanahak pongunsuban sunduan kumaa mogigiyon nokoiyonon montok tumilombus poposindak kopurimanan mongupus kumaa pogun.
