Hajiji guminambar miampai tongo’ lansanon GRS nogi’ lansanon om mongongobi’ Gagasan Rakyat.
KOTA KINABALU: Piuhupan Gabungan Rakyat Sabah (GRS) – Pakatan Harapan (PH) i noturidong talib pinogumbalan papaatu’ koporintaan pogun di wulan Koiso’2023 kotilombus sabaagi iso’ piuhupan di ouli’.
Pinopointalang haal dilo’, Boyoon Montiri, Datuk Seri Haji Hajiji Haji Noor i po nogi’ Ponorikohon GRS minoboros, haal dilo’ kopiongoi di sokodung ogirot PH Sabah soira’ GRS monoguang ponginumbalan i roitan sabaagi ‘Langkah Kinabalu’ dilo’.
Ka disio, pointonod dilo’ piuhupan GRS-PH nakalantoi minogowit kaadangon om kinomogoton id Sabah i apatut do tilombuson mimpau kinosonongon i noowit maya’ piniuhupan dilo’.
“Id kinaantakan Langkah Kinabalu di wulan Koiso’ 2023, GRS nakaanu sokodung ouli’ mantad Pakatan Harapan di ontok dilo’, nakaanu minonilombus pomorintaan koporintaan pogun gisom no do noondo.
“Pointonod dilo’, piuhupan ogirot GRS-PH i atalang minogowit kaadangon om kinomogoton kumaa pogun Sabah, maan tokou tilombuso’ sabaagi iso’ piuhupan di ouli’ om i kotumbayaan kaanu mogowit ogumu’ kosonongon om koundaran kumaa Sabah.
“Kounsikahan au’ gigina’ kumaa tongo’ lansanon PH Sabah mantad GRS,” ka disio id boboroson disio kopihondot Pitimungan Agayo Toun-toun Parti Gagasan Rakyat Sabah (Gagasan Rakyat) id Longkod Konvensyen Sompomogunan Sabah (SICC), do hiti di tadau baino’.
Id boboroson disio dilo’, noroitan nogi’ di Hajiji o koponsolon do GRS sabaagi piomungan parti nokoiyonon di ogirot id inggisaman monumboyo’ angkab rayat Sabah i mokimokito parti nokoiyonon monguasa’ pulitik pogun.
“Otopot nopo, ginaras tokou id GRS nosili iso’ mantad ‘pra-syarat’ i koowit kumaa kalantaion om kobontugan agayo parti tokou diti id koponoguangan pomilian agayo obontol.
“Lobi mantad dilo’, piisaan om ginaras GRS nga jominan po nogi’ kumaa ‘local based party’ diti do tumilombus momuruan om monguasa’ koporintaan pogun, miagal di okito noondo diti, om insyaAllah, montok pipiro hinapadan toun dumontol.
“GRS i noturidong mantad kopokionuan angkab nayatan siriba’ kotilombus koposindak pulitik ‘akomodasi’ i okikang om poinpuli miampai mongunsikou kopogisusuaian, monimbuat piupakatan nogi’ poposuul kaadangon om komogoton pogun,” ka disio.
Hajiji po nogi’ Presiden Gagasan Rakyat minoboros, ounsikou isio tu’ piuhupan om pisompuruan id GRS nokoindalan miampai osonong kopio.
Ka disio, ontok Konvensyen PBS-STAR di kaawagu diti, okito om opurimanan disio sunduan puru goduduo parti dilo’ do papatantu’ Sabah kotilombus buruanon do parti nokoiyonon.
“PBS om STAR, goduduo kiharo ginaras om pangampawong sopipoopori, nopo nga’ wookon mongunguhup kumaa nimpohon ginaras om ginirot walai agayo tokou, GRS.
“Amu’ adalaan nung boroson ku do PBS om STAR okon nopo ko’ intodonon ginoris GRS, nga yolo’ po nogi’ tambalut iso’ poburuon i toririmo id toning manahak sokodung, pomusarahan om ponontudukan, kopiongoi di tonggungan diolo’sabaagi puru id pomorintaan koporintaan GRS-PH,” ka disio.
Rinoitan po nogi’ disio pipiro haal di miagal kumaa parti komponen GRS di suai ilo’ nopo nga’ Parti Maju Sabah (SAPP), Kotinanan Kabansaan Sabah Misompuru (USNO), Parti Harapan Rakyat Sabah (PHRS), Parti Liberal Demokratik (LDP) om Parti Cinta Sabah (PCS).
Pinosotol disio, oinsanan parti komponen GRS pasanganu tinonggungan sompoopori id koponompuruan om kopoinggirotan GRS sabaagi iso’ piomungan parti nokoiyonon i bobos agayo id Sabah.
