Dr. Joachim (tanga’) guminambar pongingitanan om pinapalahat do ‘Bersatu’ miampai oinsanan i nokotindapou id Mitingan Agayo Toun-toun PBS Zon Poonsokid i kopohompit limo bohogian dilo’.
BEAUFORT: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minongunsub oinsanan puru parti do momusus timpohon Lintuhun Undangan Pogun (DUN) Lumadan id Pomilian Agayo Pogun Ko-17 (PRN17) i pohoroon amu’ no alaid.
Minoboros pinopoimagon Mitingan Agayo Toun-toun PBS Zon Poonsokid Siba’ ko-40 i kopohompit limo bohogian — PBS N.30 Bongawan, PBS N.31 Membakut, PBS N.32 Klias, PBS N.34 Lumadan om PBS N.35 Sindumin – id Lintuhun Datuk Seri Panglima Dun Banir do hiti di tadau baino’, otumbayaan isio PBS kaanu momusus timpohon DUN Lumadan.
“Nga’ iti okon ko’ karaja’ di asanang. Amu’ tokou kaanu adalaan ‘rileks’ om amu’ momoduli’, tu’ sahapon tokou diti baino’ lobi kogoris. Momoguno yolo’ do kabaalon diolo’ montok mongurias mononokodung tokou,” ka disio.
Dr. Joachim (tanga’) tuminabi’ om ruminuba’ tongo’ puru PBS i nokotindapou om tinanud di Haji Ruslan (koduo, wanan) ontok suminuang id Lintuhun Datuk Seri Panglima Dun Banir.
Pinosotol disio do nombo-nombo timpohon i nalantoi do PBS tumilombus mongobi’ Gabungan Rakyat Sabah (GRS) id PRN diti.
Dr. Joachim minamarayou nogi’ kinoulunon di Luguan Bohogian PBS Lumadan, Datuk Haji Ruslan Muharam i po nogi’ Puru Lintuhun Undangan Pogun (ADUN) Lumadan, sabaagi songulun lansanon otiu’ kumaa parti om osomok id ginawo rayat.
Kohondot dilo’, pinokianu disio oinsanan puru PBS do monguhup nogi’ di tongo’ calun ngaawi’ GRS id PRN do obontol.
“Momoguno tokou kalantaion majoriti lobi kagayo id koinsanai watas i tondingon do GRS,” ka disio pinoposotol.
Dr. Joachim (kotolu, wanan) pinopokili bondira’ PBS miampai dilo songulun puru wagu PBS om sinasi’ di Haji Ruslan (tanga’) nogi’ ilo suai.
Dr. Joachim pinoposotol nogi’ do PBS nopo nga’ somboogian mantad koporintaan om tumilombus potimporon miampai GRS.
“Parti nokoiyonon no i karati karalano’ manalasai kobolingkahangan ngaawi’ id pogun diti. Yati’ okon ko’ ‘anti-Pisompuruan’. Kakal tokou ii’ om nuru’ miuhup miampai koporintaan Pisompuruan. Asil pinibarasan maya’ MA63 nga’ nakapanahak nogi’ pipiro kinalantaion pinonugatan montok Sabah,” ka disio.
Dr. Joachim minamaramit nogi’ foom kosompuruan wagu PBS Lumadan kiginumu’ 449 tulun.
Nokotindapou nogi’ i Timbang Presiden PBS, Datuk Johnny Mositun; Luguan Tinimungan Komulakan PBS, Datuk Dr. Christoper Mandut; om tongo’ Puru Kounsol Akawas PBS nogi’ tongo’ Luguan Bohogian, Exco Koonduan, Exco Komulakan, mongobi’ mio’ontong mantad parti suang GRS.
