Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minoboros, koporintaan pogun papatahak poinponu’ kumaa undang-undang kohondot duo Puru Lintuhun Undangan Pogun (ADUN) i potoguang totondos susuap.
“Mamantang tokou do undang-undang om pologoson ‘proses’ undang-undang poindalan miagal di poinpatut. Koporintaan pogun Gabungan Rakyat Sabah (GRS) amu’ sumapul id nunu-nunu ponoriukan toi laang undang-undang kohondot nombo-nombo lansanon koporintaan,” ka disio id iso’ kointalangan do hiti, di tadau baino’.
Minongomi isio karait ADUN Sindumin, Datuk Dr. Yusof Yacob om ADUN Tanjung Batu, Datuk Andi Muhammad Suryadi Bandi i dinawa mantad ponondosan susuap id toguang Hakim Kuut Sesyen, Jason Juga do hiti, di tadau baino’.
Karait nindikohon diolo’ id koporintaan poinharo mantad, Boyoon Montiri minoboros, sorisidon disio haal dilo’ miampai poinsonong soira’ oinsanan kointalangan om ruputan poinhompit aramit.
Hajiji pinoposotol do koporintaan pogun GRS pointopot montok papatantu’ tinonggungan id kopoindalanan om ponguludan koporintaan.
Andi, i po nogi’ Monguhup Montiri Koburuon Pomorunan om Mongindapu’, nogi’ i Dr. Yusof, Ponorikohon Qhazanah Sabah Berhad, dinawa minamaramit tusin mantad songulun kingaran do i Dato Tei Jeinn Cheing montok pongunsub do monguhup maganu lisin pongukadan mineral montok duo komponi pasanganu tambalut pongindopuan di Tei.
Tei nga dinawa po nogi’ id kuut di miaagal mantad kasalaan minanahak susuap.
