Dr. Joachim (kotolu, wanan) minamaramit foom kosompuruan wagu PBS om sinasi’ di Joniston (tanga’).
KIULU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam pinoposotol do sondikoton kopio PBS id koponoguangan Pomilian Agayo Pogun (PRN) dumontol nopo nga’ montok papatantu’ Gabungan Rakyat Sabah (GRS) kotilombus oonuan mandat momorinta’ pogun diti.
Isio i po nogi’ Kumoduo Boyoon Montiri II minoboros, kalantaion monimporon GRS sabaagi koporintaan pogun oponsol montok kotilombuson koburuon om kaadangon pulitik id Sabah.
“Nuru’ tokou papatantu’ kalantaion GRS id PRN do obontol,” ka disio ontok pinopoimagon Ramai Kapamaramaian 40 Toun PBS Bohogian N.15 Kiulu id Minurod Campsite, Pahu, do hiti di konihab (13tw Kaapat).
Dr. Joachim (koduo, wanan) ruminamit tupi mantad di Joniston om sinasi’ di Aliamis (gibang) om i Golubi Guntarik, Monunurat Bohogian N.15 Kiulu.
Dr. Joachim minonugut nogi’ tonggungan PBS montok tumilombus popoburu’ kopotutan ngaawi’ rayat Sabah miagal poinsuang id Pibatosan Malaysia 1963 (MA63), suai ko’ minokianu mooi do tongo’ puru parti gumirot misompuru om mongilag piuriasan saalom.
“Tingkananon tokou do noondo nopo montok kotilombus kosudong katalib 40 toun pinonuridongan. Sukod wagu kiguno tumigulai kumaa toguang sabaagi lansanon timpu dumontol, mongilo kobolingkahangan om mogihum panalasaian,” ka disio.
Minongomi pisokodungan pulitik, Dr. Joachim pinopolombus kotumbayaan di piromutan ogirot pialatan PBS om Parti Solidariti Tanah Airku (STARSABAH), hinombo do goduduo parti pinopikogos iso’ memorandum pihunungan (MoU).
“Otumbayaan oku kopio do piuhupan diti. Somok 99 pihatus lansanon STARSABAH nopo bagas puru PBS. Poburuon tokou miagal. Nung amu’ tokou miiso’, kotilombus tokou miurias om rolou tokou amu’ orongou,” ka disio.
Ka disio kawagu, inggisaman monginggirot GRS nopo nga’ tingkananon montok papatantu’ rolou rayat Sabah kotilombus aanu popoburu’ id pomorintaan pogun om pisompuruan.
Dr. Joachim minonongkounsikou nogi’ kumaa di Luguan Bohogian PBS Kiulu, Datuk Joniston Bangkuai i po nogi’ Puru Lintuhun Undangan Pogun (ADUN) Kiulu om oinsanan puruankuasa’ manganganjur i pinonorikohon di Aliasmis Sami i po nogi’ Kumoduo Luguan Bohogian PBS Kiulu mantad kinalantaion pinapaanjur pinamaramaian dilo’.
Pinokianu disio oinsanan puru do tumilombus misompuru om kumaraja’ agaras montok papatntu’ timpohon Lintuhun Undangan Pogun (DUN) Kiulu kotimporon pasanganu parti.
Nokotindapou nogi’, Kumoduo Presiden PBS, Datuk Seri Dr. Yee Moh Chai; tongo’ Timbang Presiden, Luguan miampai Exco Komulakan PBS; tongo’ Puru Kounsol Akawas, tongo’ Luguan Bohogian, Exco Koonduan PBS om nogi’ lansanon nokoiyonon DUN Kiulu.
