Hajiji (koduo, gibang) ruminamit Buuk Ruputan Tounan Sondikoton Sabah Maju Jaya (HTSMJ) 1.0 (2021-2025) montok toun 2024 mantad di Rosmadi.
KOTA KINABALU: Boyoon Montiri, Datuk Seri Haji Hajiji Haji Noor ounsikou di naangayan sigampot Sondikoton Sabah Maju Jaya (HTSMJ) 1.0 (2021-2025) om kiangkab montok monigampot naangayan lobi kosonong.
Ka disio, koporintaan pogun maya’ tongo’ komontirian, koupisan om kotinanan pogun tumilombus kumaraja’ agaras montok papatantu’ naangayan sigampot HTSMJ kotilombus koingkawas.
“Tumilombus tokou kumaraja’ montok mamagampot naangayan lobi kosonong po kosuul no tongo’ inggisaman di napalan om masaan poindalanon,” ka disio ontok minamaramit Buuk Ruputan Tounan HTSMJ 1.0 (2021-2025) montok toun 2024 id upis disiod oid Lintuhun Undangan Pogun (DUN) Sabah di tadau baino’.
Luguan Upisor Mongungulud (CCO) Sekretariat Sabah Maju Jaya (SMJ) Koupisan Boyoon Montiri, Datuk Haji Datu Rosmadi Sulai pinapatahak buuk ruputan dilo’ om sinasi’ di Monunurat Koporintaan Pogun, Datuk Seri Sr. Safar Untong.
Hajiji minoboros, ruputan toun 2024 nopo nga’ dokumen oponsol i koponorisid naangayan kopoindalanan tongo’ inggisaman oponsol id siriba’ rangka palan koburuon limo toun HTSMJ 1.0 i nosili posunduran agayo di kosimbanon sosio-ikonomi pogun, kaampai no Ikonomi Obulou (Ekonomi Biru).
Daamot dilo’, Rosmadi pinopoilo di Hajiji gisom ko 14tw Kaapat 2025, kiginumu’ 446 inggisaman nokogura’ di tongo’ komontirian om koupisan id siriba’ Palan SMJ 1.0, miampai naangayan kopoindalanan koinsanai kounsub kopio ilo’ nopo nga’ 94.47 pihatus.
“Naangayan nopo diti nga’ kokitanan tonggungan ouli’ koinsanai pakakaraja’ pomorintaan pogun id kapalantaion ababayan koburuon Sabah miampai poinpuli, po’ompus om kiwaya’ akawas,” ka disio.
Ka disio, kinapatahakan ruputan diti okon nopo ko’ kosili ponokotanda’ kumaa kinotulidon om tinonggungan koporintaan pogun, nga kopokito nogi’ kinoburuon i nosigampot nogi’ sondikoton timpu dumontol Sabah id koponoguangan timpu koompokon kopoindalanan SMJ 1.0 dumontol 2025.
Nokotindapou nogi’ Luguan Upisor Operasi Sekretariat SMJ, Haji Ramlee Kariah om Potunud Sekretariat dilo’, Rosnih Othman.
