Dr. Joachim (tanga’) guminambar pongingitanan miampai oinsanan i nokotindapou katalib minonorikohon Mitingan Puruankuasa’ Induk Pamaramaian Kouliton Toun Kinosusuon Pinotomod Molohingon Agayo Pogun Sabah Toun 2025 id linimput Wisma Innoprise, Kota Kinabalu, di tadau baino’.
KOTA KINABALU: Mitingan kumoinsan Puruankuasa’ Induk Kapamaramaian Kinouliton Toun Kinosusuon Pinotomod di Molohingon Agayo Pogun Sabah (TYT) 2025 pinaharo di tadau baino’ katalib nakaanu kopolulusan Nuludan Montiri Pogun Sabah.
Ponorikohon Puruankuasa’ Induk, Datuk Seri Dr. Joachim Gunsalam, pinopoilo do kapamaramaian toun diti olumis kopio tu’ i po nogi’ kumoinsan poinotnod kinoposilihan di Tun Haji Musa Aman sabaagi TYT Molohingon Agayo Pogun Sabah Ko-11 di ko 1tw Koiso’ katatalib.
“Kopiongoi di Warta Koporintaan Pogun Sabah, tadau pinotomod kouliton toun kinosusuon TYT nopo nga’ ko 30tw Kotolu 2025, mogisusuai kaparagatan pamaramaian di koindalan gisom ko 21tw Koonom 2025, miampai turu’ ababayan pinotomod i maan pohoroo’ id pototongkop Sabah,” ka disio id kointalangan media di tadau baino’.
wookon kaparagatan agayo i maan poonjuro’ kaampai no Ramai Bacaan Tahlil, Doa Selamat om Solat Hajat, Istiadat Pinghuyudan, Ramai Moginakan Pogun, Tadau Etnik Sabah, nogi’ Ramai Istiadat Kapamagaán Darjah-Darjah Kapantangan, Bintang om Pingat Kapantangan Sabah.
Dr. Joachim nga’ pinoposotol nogi’ do pipiro ababayan limunduk maan pohoroo’ do ko 21tw Koonom 2025, kaampai Istiadat Pinghuyudan om Ramai Moginakan Pogun.
“Pongonjuran ababayan diti kopohompit piuhupan ogirot id pialatan mogisusuai komontirian om kotinanan pogun nogi’ Pisompuruan montok papatantu’ koturunduson om kalantaion pamaramaian,” ka disio kawagu.
minongunsikou nogi’ isio kumaa oinsanan bohogian i nokohompit id pamalanan om kopoindalanan ababayan montok papatantu’ kapamaramaian kouliton toun kinosusuon pinotomod TYT toun diti kapanau miampai poinponu’ kaadat-adato’ nogi’ kinaramaion.
