Dr. Joachim (tanga’) guminambar pongingitanan miampai oinsanan nokotindapou id ababayan dilo’.
RANAU: Koingkawason asil pogun kapasaga’ koporintaan pogun do popointutun lobi kogumu’ inggisaman koponokodung mogigiyon (pro-rakyat), kaampai id kaganaan balajaran om kopoburuan ‘modal insan’, ka di Kumoduo Boyoon Montiri II, Datuk Seri Dr. Joachim Gunsalam.
Ka disio, asil pogun miningkawas miampai poinggirot pointonod toun 2021 (RM5.49 bilion) kuminaa RM6.96 bilion di 2022, om nokotilombus noruhangan kuminaa RM6.97 bilion di toun 2023.
“Iti nakapasaga’ koporintaan pogun pinopointutun lobi kogumu’ inggisaman pro-rakyat, kaampai id kaganaan balajaran om koburuon modal insan,” ka disio ontok pinopoimagon Ababayan Panambarasan Pongunsuban SMJ & Bingkil Monimbar Ponguhotan Pinsingilaan Am 2025 id Lintuhun Mogigiyon Ranau di konihab (20tw Koduo).
Dr. Joachim po nogi’ Montiri Koporintaan Koiyonon om Pomuwalaian minoboros, koporintaan pogun toririmo manahak koposuulan di balajaran maya’ mogisuai inggisaman, wookon dilo’ Ponguhupan Tusin Porojistoran IPT (BUDI) i manahak ponguhupan pialatan RM1,500 gisom RM2,000 kumaa lobi 10,000 susumikul B40 montok mongoput balajaran kumaa nayatan akawas.
Dr. Joachim (wanan) pinopotunui setifikit ponguhupan mongindapu’ omulok id Kundasang id siriba’ Ababayan ‘Outreach’ Boyoon Montiri Miampai NGO om Mongindapu’ Omulok kumaa songulun mamaramit.
Suai ilo’, Ponguhupan Tusin Poporisaan (BAKTI) i manahak ponguhupan RM200 kumaa susumikul Tingkatan 5 om 6 montok kogunaan poporisaan; Ponguhupan Kaparagatan PIBG Sikul (BAGUS) i koposodiaan kousinan RM2,000 kumaa PIBG sikul montok popoindalan kaparagatan balajaran, naamot inggisaman SUKSES manahak kousinan RM3,000 kumaa tikid sikul id Sabah.
Ponguhupan Pongundaran Sorokoro’-Koro’ Sikul (BALKIS) koposodiaan kopoobian monginsonong sikul gisom RM50,000.
“Tabung Balajaran Pogun Sabah (TPNS) nga’ minomoruhang kousinan sikulasip soginumu’ RM127 riong montok monguhup susumikul i amu’ songkuro kikosukupan, om subsidi padsakaian RM300 patahakon kumaa susumikul Sabah i poinsikul id Semenanjung,” ka di ADUN Kundasang dilo’.
Dr. Joachim lumansan ababayan diti kapanahak koundaran kumaa oinsanan tutumanud om monginggirot po do tonggungan koporintaan id kopotontuan kalantaion balajaran id Sabah.
Ababayan dilo’ nokopotimung somok 500 susumikul id inggisaman mongingkawas sundan nogi’ komilaan akademik diolo’.
Wookon pinonuang ababayan i koimbayat nopo nga’ ponomborosan pongunsuban i pinatahak di Hadi Hidayah Tutoh om bingkil monimbang ponguhotan Pinsingilaan Am i pinoindalan di Tuan Amit Awang.
Ababayan diti kihontolon mangahak susumikul monoguang poporisaan miampai lobi kiwaya’ nogi’ popsoindak sunduan diolo’ do momogusa’ kalantaion akademik.
Minongunsikou do IKRAR om Upis Balajaran Watas (PPD) Ranau mantad kinopongonjuran ababayan diti kotumbayaan kapanahak koundaran agayo kumaa tongo’ susumikul id watas Ranau, Dr. Joachim pinopoboros nogi’ tonggungan koporintaan pogun id kopoburuan modal insan kopiongoi di Sondikoton Sabah Maju Jaya (SMJ) i pinointutunan pointonod ko 29tw Kotolu 2021.
Suai dilo’, id ababayan diti nokindalan nogi’ kinapatahakan ponguhupan kuminaa 100 mongingindapu’ omulok id Kundasang id siriba’ Ababayan ‘Outreach’ Boyoon Montiri Miampai NGO om Mongindapu’ Omulok.
Tikid mongindapu’ nakaramit ponguhupan ‘one-off’ soginumu’ RM500, kituduan monguhup diolo’ momoruhang modal pongindopuan om mongingkuri’ tonggungan kos balanja masi.
